Белгілі суретші, антиядролық қозғалыс белсендісі Кәріпбек Күйіковтың «Қайсар рух» атты өмірбаяндық кітабы жақында ғана жарық көргенімен, бүгінде оның атауы Қазақстан шекарасынан тыс жерлерге де жетті.
Кітаптың тұсаукесері БҰҰ алаңында өтіп, әнші Димаш Құдайберген республикалық «Кітап оқитын ұлт» марафоны барысында автор мен оның естеліктері туралы айтып берді. Енді тағылымы мол туындының тұсаукесері Қарағандыда да өтті.
Н. Гоголь атындағы кітапханамен бірлесіп ұйымдастырылған кездесу «Кітап оқитын ұлт» жобасы аясында облыстық тарихи-өлкетану мұражайында өтті. Кездесу барысында суретшінің шығармалары да көпшілік назарына ұсынылды.
«Қайсар рух» — бала кезінен тағдырдың талай сынағына мойымай, өзгелер мүмкін емес деп қабылдаған дүниелерді бағындыруға ұмтылған адамның өмір жолы жайлы сыр шертетін кітап. Кәріпбек Күйіков онда балалық шағын, ата-анасын, азамат болып қалыптасу кезеңін, өмір жолында кездескен адамдарды және суретші мен қоғам қайраткері ретінде қалыптасу жолын баяндайды.
Кітаптың жазылуына ондаған жыл қажет болды. Осыдан шамамен 35 жыл бұрын Кәріпбек Күйіков өз естеліктерін қағазға түсіре бастаған. Алайда бұл жұмысты аяқтауға мүмкіндік болмаған. Биыл жылдың басында суретші SOZ баспасының әдеби бюросының үндеуін көріп, кітап жазу туралы ойына қайта оралған. Ол өміріндегі оқиғаларды дауыстап айтып отырған, ал редактор оның әңгімелерін көркем мәтінге айналдырған. Кітап SOZ бастамасымен және демеушілердің қолдауымен жарық көрді.
— Бұл кітап тек менің өмірім туралы емес. Ол өмір жолымда бағыт-бағдар беріп, қиындықтарды еңсеруге көмектескен барша адам туралы. Мен бала кезімнен қайсар әрі тынымсыз болдым, бір орында отыра алмайтынмын. Жүзуді, велосипед тебуді, шаңғы мен коньки тебуді үйрендім. Маған кей нәрселерге тыйым салатын, бірақ мен бәрібір байқап көретінмін. Мен тағдырыма ешқашан шағымданған емеспін. Басқалардың да мына нәрсені түсінгенін қалаймын: адамды мықты ететін — оның сыртқы жағдайы емес, ішкі рухы. Менің мақсатым — адамдарға шабыт беріп, өз күшіне деген сенімін нығайту, — дейді Кәріпбек Күйіков.
Суретші бұл кітабын ата-анасының рухына арнаған. Кездесу барысында ол өміріндегі сан алуан оқиғаларды — қиындыққа толы сәттерді де, көңілді кездерді де еске алды.
Облыс әкімінің орынбасары Әлібек Әлденей Күйіковтың кітабы ядролық сынақтардың тарихын адам тағдырлары арқылы тереңірек түсінуге мүмкіндік беретінін атап өтті.
— Ядролық сынақтар туралы айтқанда, көбіне әскери қуат пен ғылыми жетістіктер еске түседі. Ал сіздің кітабыңыз осының артында адамдардың тағдыры, олардың денсаулығынан айырылуы, өмірінің ойран болуы және оның кейінгі ұрпаққа тигізген зардабы тұрғанын ойлауға жетелейді. Осындай куәліктер Қазақстанның неліктен ядролық қарусыз жолды таңдағанын саналы түрде түсінуге мүмкіндік береді, — деді ол.
Ал әнші Димаш Құдайберген Кәріпбек Күйіковты нағыз суперқаһарманға теңеді.
— Бұл жай ғана өмірбаян емес. Бұл — өкінішке қарай, қолсыз дүниеге келсе де, осы жағдайдың өз өмірінің шекарасын белгілеуіне жол бермеген адамның тарихы. Ол үлкен суретшіге, жазушыға айналды. Оның шығармашылығы кейде кез келген сөзден де әсерлі сөйлейді, — деді әнші.
Автордың айтуынша, Димаштың әлеуметтік желідегі жарияланымынан кейін кітапқа қазақстандықтар ғана емес, шетелдік оқырмандар да қызығушылық таныта бастаған.
Әзірге «Қайсар рух» кітабы шағын таралыммен жарық көрді: қазақ және орыс тілдерінің әрқайсысында 300 данадан басылған.
Оқырмандардың қызығушылығына қарағанда, кітап көп ұзамай сирек кездесетін басылымға айналып, қосымша таралыммен қайта шығарылуы мүмкін.
