2026 жылғы 29 қыркүйекте Шардара қаласындағы Абай атындағы мәдениет сарайында танымал композитор әрі орындаушы Ахмет Молдағұловтың өнердегі 40 жасқа толуына орай, «Кел, досым, Шардараға!» атты шығармашылық ән кеші өтті.
Мазмұнды мәдени шараның негізгі мақсаты – Ахмет Молдағұловтың қырық жылдық шығармашылық жолын кеңінен насихаттап, оның қазақ музыкасы мен ән өнеріне қосқан үлесін дәріптеу, өнер иесіне деген ел ықыласын білдіру.
Кеш барысында композитордың шығармашылық жолы таныстырылып, әр жылдары дүниеге келген әндері орындалды. Әуезді ән мен сырлы сазға ұласқан концерттік бағдарлама көрерменге көтеріңкі көңіл күй сыйлап, өнерсүйер қауымға әсерлі кеш тарту етті.
Шығармашылық кешке елімізге танымал өнер иелері – Нұрлан Өнербаев, Досымжан Таңатаров, Жұбаныш Жексенұлы, Бауыржан Исаев және басқа да белгілі әншілер мен ақын-жазушылар қатысып, мерейтой иесіне өздерінің шығармашылық сәлемін жолдады.
Сонымен қатар Шардара ауданының өнерпаздары Бақберген Омаров, Эльмира Шонаева және өзге де жергілікті өнерпаздар сахна төрінде өнер көрсетіп, кештің мазмұнын байыта түсті.
Кеш қонақтары Ахмет Молдағұловтың танымал әндерін орындап, ақындар арнау-жырларын оқып, мерейтой иесінің шығармашылығына деген ыстық ықыластары мен ізгі тілектерін жеткізді.
Қырық жыл – шығармашылық жол үшін үлкен белес. Бұл – үздіксіз ізденіс пен еңбектің, өнерге адалдық пен шығармашылық табандылықтың нәтижесі. Осы жылдар ішінде Ахмет Молдағұловтың туындылары тыңдарман жүрегінен орын алып, өнерсүйер қауымның рухани қазынасына айналды.
«Кел, досым, Шардараға!» шығармашылық кеші өнер иесінің мерейтойын атап өтумен ғана шектелмей, Шардараның мәдени өміріндегі мазмұнды шаралардың біріне айналды. Сахна төріндегі ән мен әуен, ақындардың арнауы мен өнерпаздардың орындауы көрерменге ерекше әсер сыйлады.
Шардара төрінде өткен тағылымды кеш – өнерге құрметтің, шығармашылық еңбекті бағалаудың және ұлттық өнерді дәріптеудің жарқын көрінісі болды.
Өнер бар жерде – рух бар. Ән бар жерде – жүрек бар. Жүректен шыққан өнер халықпен бірге жасай береді.
Шардара ауданы әкімдігінің баспасөз қызметі.
