Саран қаласындағы Silk Road Electronics зауытында ультрадыбыстық диагностикалық жүйелер өндіріле бастайды. Бұл қазіргі уақытта Samsung тұрмыстық техникасын шығарып отырған кәсіпорын үшін өндірістің жаңа бағыты болмақ.
УДЗ аппараттарын шығару кезең-кезеңімен жүзеге асырылады. Зауытта қажетті жабдықтар орнатылып, өндірістік үдерістер жолға қойылады. Сонымен қатар Қазақстан аумағында тікелей орындалатын өндірістік операциялардың үлесін біртіндеп арттыру жоспарланып отыр.
Жобаның серіктесі — медициналық ультрадыбыстық жүйелер өндіруге маманданған оңтүстіккореялық Samsung Medison компаниясы. Оның жабдықтары радиология, кардиология, акушерлік және гинекология салаларында қолданылады. Аппараттарда кескіндерді өңдеудің заманауи технологиялары мен диагностикалауға арналған цифрлық шешімдер пайдаланылады.
Silk Road Electronics үшін медициналық жабдықтар өндірісін іске қосу Сарандағы зауытты дамытудың келесі кезеңі болмақ.
Қазір кәсіпорында Samsung маркалы теледидарлар мен кір жуғыш машиналар шығарылады.
