ЖЕКЕ ТҰЛҒАЛАРДЫҢ БЕРЕШЕКТЕРІН ӨНДІРУ МӘСЕЛЕЛЕРІ ТАЛҚЫЛАНДЫ

ЖЕКЕ ТҰЛҒАЛАРДЫҢ БЕРЕШЕКТЕРІН ӨНДІРУ МӘСЕЛЕЛЕРІ ТАЛҚЫЛАНДЫ

Түркістан облысы бойынша Мемлекеттік кірістер департаментінде Департамент басшысы М. Нұрахаевтің төрағалығымен жеке тұлғалардың берешектерін өндіру мәселелері бойынша дөңгелек үстел өтті.

Іс-шараға Түркістан облысының прокуратурасы, Түркістан облысының Әділет департаменті, Полиция департаментінің қызметкерлері, сондай-ақ сот орындаушылары қатысты.

Дөңгелек үстел барысында жеке тұлғалардың салықтық берешектерін өндіру бойынша атқарылып жатқан жұмыстардың нәтижелері талқыланып, берешекті өндіріп алу тетіктерін жетілдіру, мемлекеттік органдар арасындағы өзара іс-қимылды күшейту және проблемалық мәселелерді бірлесіп шешу жолдары қаралды.

Қазақстан Республикасының «Салық және бюджетке төленетін басқа да міндетті төлемдер туралы» кодексінің (Салық кодексі) 190-бабының 3-тармағына сәйкес, жеке тұлға салық берешегін орындамаған жағдайда, салық органы Қазақстан Республикасының атқарушылық іс жүргізу және сот орындаушыларының мәртебесі туралы заңнамасында айқындалған тәртіппен мәжбүрлеп орындату үшін салық бұйрығын аумақтылығы бойынша тиісті әділет органдарына не жеке сот орындаушыларының өңірлік палатасына жібереді.

Осыған байланысты, кездесу барысында Салық кодексінде көзделген талаптарды сақтау, салық берешегін мәжбүрлеп өндіріп алу шараларының тиімділігін арттыру және уәкілетті органдардың өзара іс-қимылын одан әрі жетілдіру мәселелеріне ерекше назар аударылды.

Сонымен қатар, берешегі бар азаматтарға салықтық міндеттемелерін уақытылы орындау қажеттілігі бойынша түсіндіру жұмыстарын күшейту, берешекті өтеу мүмкіндіктері туралы ақпараттандыру және өндіріп алу процесінің тиімділігін арттыруға бағытталған ұсыныстар талқыланды.

Дөңгелек үстел қорытындысы бойынша қатысушылар жеке тұлғалардың салықтық берешектерін өндіру бағытындағы жұмыстарды жүйелі түрде жалғастырып, мемлекеттік органдар арасындағы өзара іс-қимылды одан әрі күшейту қажеттігін атап өтті.

Салық берешегін уақытылы өтеу – заң талаптарын сақтау және азаматтың өз салықтық міндеттемесін орындауының маңызды көрсеткіші.