Мектеп ас блогының қызметкерлеріне қандай талаптар қойылады?

Білім беру объектілерінің ас блоктарындағы технологиялық операцияларға орындалатын жұмыстардың сипатына сәйкес келетін кәсіптік даярлығы (біліктілігі, мамандығы) бар және қолданыстағы санитариялық қағидалардың талаптарын сақтайтын персонал тартылады. Ас блогының әр қызметкері медициналық тексеруден және гигиеналық оқудан өтуі керек.

Күн сайын медицина қызметкері немесе жауапты адам дайын тағамдардың сапасына органолептикалық бағалау жүргізеді, тамақтану сапасын мерзімді бағалауды бракераж комиссиясы жүргізеді, оның құрамы міндетті түрде медицина қызметкерін, әкімшілікті, өндіріс меңгерушісін және ата-аналар комитетінің өкілін қоса отырып, объект басшысының бұйрығымен айқындалады.

Объектіде маусымдық (жаз – күз, қыс – көктем) ұтымды, теңдестірілген екі апталық мәзір жасалады. Күн сайын тамақтану залында объектінің басшысы бекіткен ас мәзірі ілінеді, онда тағамдардың атаулары, әрбір дайын тағамның шығуы көрсетіледі.

Барлық білім беру объектілерінде асхана персоналының еңбек жағдайларын және жеке гигиена қағидаларын сақтауы үшін жағдайлар жасалуға тиіс. Ас блогының қызметкерлері, техникалық персонал жеке заттарынан бөлек сақталатын арнайы киіммен (халат немесе шалбары бар күртеше, бас киім, аяқ киім) қамтамасыз етіледі. Ас блоктарында қол жуу үшін қолжуғыш раковиналар орнатылады, қол жууға және кептіруге арналған құралдармен қамтамасыз етіледі.

Объектіден шыққан кезде және дәретханаға барар алдында персонал арнайы киімін шешіп, жұмыс басталар алдында және дәретханаға барғаннан кейін, сондай-ақ жұмыстағы әрбір үзілістен және ластанған заттармен жанасқаннан кейін қолдарын сабынмен жууы қажет. Асхана қызметкерлері шаштарын қалпақтың немесе орамалдың астына жинап, әшекейлерді (сағаттар, сақиналар, білезіктер) шешіп, тырнақтарын қысқа кесіп, лакпен жаппауы тиіс. Шикізатқа және дайын өнімге бөгде заттардың түсуін болдырмау үшін арнайы киімді түйреуішпен, инемен түймелеуге және халаттың қалтасында жеке тұрмыстық заттарды сақтауға болмайды.

Білім алушылар мен тәрбиеленушілерді тамақ дайындауға, көкөністерді тазалауға, дайын тамақты таратуға, нан кесуге, ыдыс жууға, өндірістік үй-жайларды жинауға байланысты жұмыстарға тартуға жол берілмейді.