Жоғары және (немесе) жоғары оқу орнынан кейінгі білім беру ұйымдардың оқытушылары мен басшыларына қойылатын біліктілікті арттыру талаптары қандай және біліктілікті арттыру курстарын өту қандай құжаттармен расталады?
Қазақстан Республикасының Ғылым және жоғары білім министрінің 2024 жылғы 5 қаңтардағы № 4 https://adilet.zan.kz/kaz/docs/V2400033892 бұйрығымен бекітілген біліктілік талаптарына сәйкес (бұдан әрі – БТ) жоғары және (немесе) жоғары оқу орнынан кейінгі білім беру ұйымдары оқытушылардың (бұан әрі – ЖЖОКБҰ) біліктілігін арттыруды кемінде әр 3 жылда бір рет, оқу курсының көлемі кемінде 72 сағат және оқытылатын пәндер профиліне сәйкес ұйымдастыруға міндетті.
ЖЖОКБҰ басшыларының және оның орынбасарларының менеджмент саласында үш жылда кемінде бір рет біліктілігін арттыру қажет. Кадрлар даярлаудың бөлек бағыттары бойынша арнайы талаптар көзделген. «Сәулет және құрылыс» бағыты бойынша біліктілікті арттыру оқытылатын пәндер бейіні бойынша ғылыми-зерттеу, іздестіру, жобалау және өндірістік ұйымдарда жүзеге асырылуы тиіс. «Өнер» бағыты бойынша біліктілікті арттыру оқытылатын пәндер бейіні бойынша мәдениет және өнер саласындағы оқу, шығармашылық, ғылыми-зерттеу және басқа ұйымдарда жүзеге асырылуы тиіс. «Денсаулық сақтау» бағыты бойынша біліктілікті арттыру Қазақстан Республикасы Денсаулық сақтау министрінің 2020 жылғы 21 желтоқсандағы № ҚР ДСМ-303/2020 бұйрығымен бекітілген денсаулық сақтау саласындағы мамандарға қосымша және формальды емес білім беру қағидаларын https://adilet.zan.kz/kaz/docs/V2000021847 сәйкес жүргізіледі.
Біліктілікті арттыру курсын өткенін растайтын құжаттар ретінде сертификат және тыңдаушының есебі болып табылады. Сертификатта келесі реквизиттер болуы тиіс: курс атауы және профилі; оқыған сағаттардың көлемі; курс өткен кезең (басталу және аяқталу күндері); ұйымдастырушы ұйымның қолтаңбасы және мөрі (керек болған жағдайда); сертификат нөмірі немесе басқа да идентификациялық деректер.
Мысалы, университеттің Б. есімді оқытушысы өз пәні бойынша біліктілігін арттыру курсын өтті. Алайда курстың көлемі 12 сағат болып, 72 сағаттан кем болды, бұл жоғары оқу орындары мен жоғары оқу орнынан кейінгі білім беру ұйымдарына қойылатын БТ сәйкес келмейді.