Қаржы нарығын реттеу және дамыту агенттігінің басшылығы Жалпыұлттық коалиция мүшелерімен және қаржы секторының өкілдерімен Мемлекет басшысының бастамасы аясында Қазақстан Республикасының Конституциясына енгізілген өзгерістерді талқылауға арналған кездесуге қатысты.
Іс-шараға Қаржы нарығын реттеу және дамыту агенттігінің Төрағасы Мәдина Әбілқасымова, Қазақстан қаржыгерлерінің қауымдастығы кеңесінің Төрағасы Елена Бахмутова, «Қазақстан микроқаржы ұйымдарының қауымдастығы» ЗТБ кеңесінің Төрағасы Ербол Омарханов, «Әділетті және прогрессивті Қазақстанның халық Конституциясы үшін!» Жалпыұлттық коалициясының мүшелері қатысты, сондай-ақ екінші деңгейдегі банктердің, сақтандыру және микроқаржы секторларының және бағалы қағаздар нарығының өкілдері қатысты.
Кездесуге қатысушылар жаңа Конституция жобасының негізгі ережелерін, оның елдің одан әрі әлеуметтік-экономикалық дамуы үшін маңыздылығын, сондай-ақ ұсынылған конституциялық нормалардың қаржы секторын дамыту үшін орнықты құқықтық және институционалдық ортаны қалыптастыруға әсерін талқылады. Заң үстемдігі қағидаттарын нығайту, азаматтардың құқықтарын қорғау және мемлекеттік басқарудың тиімділігін арттыру мәселелеріне ерекше назар аударылды.
Агенттік Төрағасы М. Әбілқасымова кіріспе сөзінде Мемлекет басшысының бастамасымен қолға алынған жаңа Конституция Қазақстан мемлекеттілігінің іргелі негіздерін, атап айтқанда егемендігін, тәуелсіздігін және аумақтық тұтастығын бекітетінін атап өтті. Оның айтуынша, құжат мемлекеттіліктің тарихи сабақтастығын көрсетіп, мемлекет дамуының заманауи құқықтық негізін қалыптастырады.
Конституция Мемлекет басшысының саяси бағдарының стратегиялық пайымын бекітеді және елдің дамуы үшін ұзақ мерзімді негіз қалайды. Бұл тек Негізгі заңды жаңарту ғана емес, әділдік, мемлекеттің қоғам алдындағы жауапкершілігі және азаматтардың құқықтары мен бостандықтарын нығайту қағидаттарына негізделген басқарудың заманауи институционалдық моделін қалыптастыру болып табылады.
«Соңғы жылдары Мемлекет басшысы қоғам өмірінің барлық салаларында ауқымды саяси, экономикалық және әлеуметтік реформалар жүргізді. Қазіргі уақытта еліміз жаңғыру процесінен өтуде, бұл ретте өзгерістердің басты қағидаттары Әділетті Қазақстанды қалыптастыру, Заң мен Тәртіп қағидаттарын нығайту, «Таза Қазақстан» бастамаларын іске асыру, құқық бұзушылықтар мен сыбайлас жемқорлыққа төзбеушілік, мемлекеттің қоғам алдындағы жауапкершілігі мен есептілігін арттыру болып табылады.
Мемлекеттік органдар және жалпы алғанда қоғам басшылыққа алатын осы қағидаттар мен идеологемалар бүгінде заманауи мемлекеттік саясаттың бөлігі болып табылады. Олар жаңа Конституцияның жобасында тікелей бекітілді», – деп атап өтті М. Әбілқасымова.
Сонымен бірге реттеуші басшысы жаңа Конституцияны қабылдау қажеттілігі қоғам мен экономикадағы заманауи өзгерістерге байланысты екендігін атап өтті.
«Жаңа негізгі Заң елдің экономикалық дамуы үшін маңызды ережелерді бекітеді. Атап айтқанда, ұлттық валютаның конституциялық мәртебесі, сондай-ақ инвестицияларды тарту және экономикалық өсуді ынталандыру үшін ерекше қаржылық режимі бар аумақтарды құру мүмкіндігі. Мемлекеттік саясаттың құқықтық орнықтылығы мен болжамдылығы қолайлы инвестициялық ахуал, кәсіпкерлікті дамыту және экономикалық тұрақтылықты нығайту үшін негіз қалайды» – деп айтты Агенттік Төрағасы.
Өз кезегінде Қазақстан қаржыгерлері қауымдастығы кеңесінің Төрағасы Елена Бахмутова қаржы жүйесінің тиімді жұмыс істеуі үшін заңның үстемдігі, мемлекеттік институттардың орнықтылығы, реттеудің ашықтығы және мемлекеттік саясаттың болжамдылығы сияқты базалық шарттар аса маңызды екенін атап өтті.
«Бұл тұрғыда институционалдық орнықтылық пен құқықтық жүйенің сапасы елдің инвестициялық ахуалына тікелей байланысты. Ішкі, сол сияқты халықаралық инвесторлар үшін меншік құқығын қорғау, сот жүйесінің тәуелсіздігі, шешім қабылдаудың ашықтығы және бизнесті жүргізу қағидаларының орнықтылығы маңызды. Дәл осындай іргелі жағдайлар экономикаға деген сенімді қалыптастырады және ауқымды инвестициялық жобаларды іске асыру және орнықты экономикалық өсу үшін қажетті ұзақ мерзімді капиталды тартуға мүмкіндік береді», – деді Е. Бахмутова.
«Қазақстан микроқаржы ұйымдарының қауымдастығы» ЗТБ кеңесінің Төрағасы Ербол Омарханов Қазақстан Конституциясының жаңа жобасына енгізілген қағидаттар әділдік, заңдылық және жауапкершілік қағидаттарына негізделген биліктің теңгерімді және есеп беретін жүйесін қалыптастыруға бағытталғанын атап өтті.
«Елдің қаржы және кәсіпкерлік секторы үшін тұрақты және заманауи конституциялық негіз ерекше маңызға ие. Ол болжамды құқықтық ортаны қалыптастырады, бизнестің дамуына ықпал етеді, инвесторлардың сенімін нығайтады және орнықты экономикалық өсуге жағдай жасайды», – деп атап өтті Е.Омарханов.
Сондай-ақ кездесу барысында қаржы секторының өкілдері Қазақстанның инвестициялық тартымдылығын арттырудағы, қаржылық тұрақтылықты нығайтудағы және ұлттық экономиканы дамытудағы конституциялық реформалардың рөлі туралы пікір алмасты. Конституциялық негізді жаңарту мемлекеттік басқаруды одан әрі жаңғыртудың және азаматтардың мүдделеріне және елдің орнықты дамуына бағдарланған тиімді институттарды қалыптастырудың маңызды кезеңі болып табылатыны атап өтілді.