Алматы қаласында CFO SUMMIT XIII саммиті өтті, оның шеңберінде қаржы нарығын дамыту және корпоративтік басқару мәселелері талқыланды. Саммит жұмысына Қаржы нарығын реттеу және дамыту агенттігі Төрағасының орынбасары Нұржан Тұрсынханов қатысты.
Сөз сөйлеу барысында Нұржан Тұрсынханов банк секторын жүйелі жаңғыртудан кейін мемлекеттік саясаттың басымдығы экономикаға ұзақ мерзімді инвестициялардың негізгі көзі ретінде қор нарығына ауысатынын атап өтті.
«Мемлекет басшысы біздің алдымызға ауқымды және стратегиялық маңызды міндет қойды – озық халықаралық практикалар мен қазіргі экономиканың қажеттіліктерін ескере отырып, бағалы қағаздар нарығы туралы заңнаманың құрылымын кешенді қайта қарау. Осы міндетті іске асыру мақсатында Агенттік Ұлттық Банкпен бірлесіп Қор нарығын дамытудың 2030 жылға дейінгі бағдарламасын және Бағалы қағаздар нарығы туралы жаңа заңды әзірлеуге кіріседі», – деп атап өтті Нұржан Тұрсынханов.
Жаңа заңды қабылдау капиталды экономиканың нақты секторына тиімді түрде қайта бөлуге қабілетті икемді және тұрақты экожүйені құруға бағытталған. Бұл жұмыс институционалдық, бөлшек және шетелдік қатысушылар есебінен инвесторлық базаны кеңейту, жеке сектор компанияларының қор нарығына шығуын ынталандыру, қор нарығының инфрақұрылымын жетілдіру, қор нарығының жаһандық капитал нарықтарына ықпалдасуын арттыру, қор нарығында жаңа қаржы өнімдері мен инновацияларды енгізу, корпоративтік басқаруды дамыту және реттеуші модельді кешенді қайта жүктеу сияқты жеті негізгі бағыт бойынша құрылатын болады.
Сонымен қатар, жаһандық капитал нарықтарына интеграцияны тереңдету, корпоративтік басқаруды жетілдіру және реттеудің барынша тәуекелге бағдарланған және икемді моделіне көшу жөніндегі шаралар көзделген. Осы шараларды іске асыру қор нарығын реттеудің икемділігін арттыруға мүмкіндік береді, инновацияларды енгізу үшін қолайлы орта жасайды және капитал нарығын дамытуға ықпал етеді.
«Жетекші халықаралық және қазақстандық сарапшылармен бірлесіп, қолданыстағы заңнаманың өзектілігіне бағалау жүргізіледі және бағалы қағаздар нарығын реттеуге бірыңғай, жүйелік базалық тәсіл қалыптастырылады. Жұмыс ішкі қор нарығы мен АХҚО-ның синергиясын қамтамасыз ету, KASE өкілеттіктерін кеңейту және жүйелік тәуекелдерді бағалауға басымдық бере отырып қадағалау тәсілдерін қайта қарауға негізделетін болады», – деп атап өтті Агенттік Төрағасының орынбасары.
Қор нарығын дамытудың 2030 жылға дейінгі бағдарламасы 2026 жылғы қыркүйекке дейін әзірленетін болады, Бағалы қағаздар нарығы туралы жаңа заң жобасы биыл жылдың соңына дейін дайындалатын болады.