Қадиша Оспанованың төрағалығымен әлеуметтік-мәдени даму және халықты әлеуметтік қорғау жөніндегі тұрақты комиссияның кеңейтілген отырысы өтті. Депутаттар есірткі тұтыну мен есірткі құқық бұзушылықтарының алдын алу, дене шынықтыру мен спортты дамыту, жаңа облыстық жедел медициналық жәрдем станциясын салу, Денсаулық сақтау жөніндегі өңірлік үйлестіру кеңесін құру, сондай-ақ өңірлік нышанды жаңарту мәселелерін қарады.
Отырысты аша отырып, бейіндік комиссияның төрағасы Қ.Б. Оспанова есірткі тұтынудың алдын алу жұмыстың басым бағыттарының бірі болып қала беретінін атап өтті.
«Бүгінгі таңда негізгі қауіп – синтетикалық есірткіні интернет-желілер, мессенджерлер және контактісіз өткізу тәсілдері арқылы тарату. Депутаттар бұл мәселені үнемі бақылауда ұстап, профилактикалық жұмысты қосымша қаржыландыруға бастамашы болды. Сонымен қатар, жүйелі шараларды одан әрі күшейту қажет, әсіресе жастармен жұмысты», – деді Қадиша Оспанова.
Қарағанды облысы полиция департаментінің мәліметінше, жеті айда 130 есірткі құқық бұзушылық тіркелген. Заңсыз айналымнан 436 кг есірткі, оның ішінде 356 кг синтетикалық есірткі, сондай-ақ 4,3 тонна прекурсорлар тәркіленген. Екі ірі есірткі лабораториясы жойылып, үш фотолаборатория анықталған.
Өңірде профилактикалық іс-шаралар кешені жүргізілуде. Жастар ресурстық орталықтары жыл басынан бері 6 мыңға жуық адамды қамтитын 59 ірі іс-шара ұйымдастырған. Облыстық жастар ресурстық орталығының жанында Нашақорлықтың алдын алу жөніндегі фронт-офис жұмыс істейді.
Сонымен қатар, депутаттар біржолғы акциялардан жұмыстың ұзақ мерзімді форматтарына көшу қажеттігін мәлімдеді.
«Бүгінде бір реттік іс-шаралардан жастармен жүйелі және ұзақ мерзімді жұмысқа көшу маңызды. Тренингтер мен тәлімгерлік бағдарламалардың жылдық циклдерін дамыту, тәуекел тобындағы жасөспірімдермен жұмысты күшейту, ерте анықтау мен жеке сүйемелдеуді қамтамасыз ету қажет. Жастар үшін қолжетімді әрі құпия кері байланыс арналарын құру да маңызды бағыт болып табылады», – деді депутат Ермек Әбілдин.
Талқылау қорытындысы бойынша Фронт-офистің мобильдік бригадаларының жұмысын күшейту, нарколог, психолог, заңгер және полиция қызметкерін ауылдық округтерге тоқсанына кемінде бір рет баруын қамтамасыз ету ұсынылды. Сондай-ақ, қашықтықтан консультациялар, «ата-аналар патрулі» жобасы, мектептер мен колледждердегі профилактикалық семинарлар мен ата-аналарға арналған ақпараттық ресурстарды дамыту жөнінде ұсынымдар берілді.
Депутаттар дене шынықтыру мен спортты дамытудың 2027-2029 жылдарға арналған перспективалық жоспарын да қарастырды. Бүгінде облыста 1 384 спорт нысаны бар, халық 69 пайызға спорттық инфрақұрылыммен қамтамасыз етілген. Алдағы кезеңге шамамен 3,2 млрд. теңге шамасында қаржыландыруды қажет ететін 20 нысанды жөндеу жоспарлануда.
Ауылдық жерлерде спорттық инфрақұрылымды, бұқаралық және инклюзивті спортты дамытуға ерекше көңіл бөлінуде. Қарағандыда «Спорт кластері» жобасын іске асыру, сондай-ақ облыстың елді мекендерінде модульдік және тез салынатын спорт ғимараттарын салу жалғасады.
Бұл ретте, депутаттар бюджет қаражатын ұтымды пайдалану мен капиталды көп қажет ететін жаңа объектілерді тек негізді қажеттілік болғанда, қаржы-экономикалық негіздеме және оларды кейіннен ұстау мүмкіндіктері болған жағдайда ғана салу қажеттігін атап өтті.
Денсаулық сақтау саласында жаңа облыстық жедел медициналық жәрдем станциясының алдағы уақыттағы құрылысы мәселесі қаралды. Құрылыстың жаңа жобаларын іске асыру бойынша мораторийге қарамастан, Денсаулық сақтау басқармасы осы кезеңде объектіні перспективалық жоспарда көздеп, оны кейіннен «толық бітіріп берілетін» құрылыс объектілерінің тізбесіне енгізу мәселесін пысықтау қажеттігін алға тартты. Жұмыс істеп тұрған станция 1972 жылы салынған, ауданы 1 245 шаршы метр ғимаратта орналасқан. Жыл сайын жедел қызмет 430 мыңнан астам, медициналық авиация 700-ге жуық сапар орындайды. Жобада 103 қызметінің диспетчерлік орталығы, медициналық авиация блогы, 45 автомобильге арналған гараж, дезинфекция және техникалық қызмет көрсету аймақтары, сондай-ақ оқу-симуляциялық блокты қамтитын шамамен 7,9 мың шаршы метр аумақты қамтитын заманауи кешеннің құрылысы көзделген.
Денсаулық сақтау басқармасының ұсынысын тұрақты комиссияның депутаттары бірауыздан қолдады.
Сонымен қатар, депутаттар халықтың денсаулығына әсер ететін мәселелер бойынша ведомствоаралық өзара іс-қимылды қамтамасыз етуге тиіс Денсаулық сақтау жөніндегі өңірлік үйлестіру кеңесін құру мәселесін қарады. Негізгі бағыттардың қатарына медициналық көмектің сапасы мен қолжетімділігі, аурулардың алдын алу, балалардың денсаулығын қорғау, санитарлық-эпидемиологиялық қауіпсіздік, әлеуметтік қорғау және салауатты өмір салтын қалыптастыру жатады.
Отырыс соңында Қарағанды облысының өңірлік нышанын жаңарту мәселесі қаралды. Өткізілген байқау аясында 17 эскиздік жоба ұсынылған. Станислав Аппазовтың жобасы жеңімпаз атанған. Жаңа нышанда аймақтың табиғи ресурстары, су қоймалары, аграрлық және өнеркәсіптік әлеуеті, кеншілер тарихы мен мәдени мұрасы көрініс тапқан.
Отырыс қорытындысы бойынша депутаттар профилактикалық жұмысты одан әрі жетілдіру, спорттық инфрақұрылымды дамыту, медициналық объектілерді жаңғырту мен ведомствоаралық өзара іс-қимылды нығайту бойынша ұсыныстар мен ұсынымдарды нақтылады.
Жүйелі тәсілдерді қолдану, бюджет қаражатын тиімді пайдалану және Қарағанды облысының барлық аймақ тұрғындары үшін әлеуметтік қызметтердің қолжетімділігін қамтамасыз ету қажеттілігіне ерекше назар аударылды.
