Қарағанды облысының SARYARQA телеарнасы жаңа маусымды елеулі өзгерістермен бастады. Студияда аумағы 45 шаршы метр болатын LED-экран мен тігіссіз еден пайда болды. Телевизия мамандары мұндай жаңғыртуды көптен бері армандаған еді. Студияның жаңа келбетімен қатар, эфирге жаңа жобалар да жол тартты.
Телеарна жаңа маусымын көпшілікке таныстырды. Презентацияға телевизия саласының ардагерлері, әріптестер мен серіктестер шақырылды. Іс-шараға облыс әкімінің орынбасары Әлібек Әлденей, «Қазақстан» РТРК» АҚ басқарма төрағасының орынбасары Еркін Мұхамеджанов қатысты.
— Өңірлік бұқаралық ақпарат құралдарының маңызды артықшылығы бар. Олар өз аумағын және тұрғындарды толғандыратын мәселелерді жақсы біледі. Мұнда ақпараттың дәлдігі мен шынайылығы аса маңызды. Бұл — уақыт өте келе маңызын жоғалтпайтын кәсіби қағида. Қарағанды телевизиясының алғашқы эфирге шыққанына биыл 68 жыл болды. Осы уақыт ішінде технология да, көрермен де, ақпарат тарату тәсілдері де өзгерді. Алайда ең басты құндылық — аудиторияның сенімі өзгеріссіз қалды, — деді Әлібек Әлденей телеарна ұжымына жаңа маусымда табыс тілеу барысында.
SARYARQA телеарнасының директоры Жұрағат Баман жаңарудың шынайы нәтижесін көрермен эфирден көріп, сезінуі керек екенін атап өтті.
— Жаңа студия — біз үшін ең алдымен құрал. Техниканың өзі сапалы телевизия жасамайды. Ең бастысы — мазмұн. SARYARQA — тарихы терең, өзіндік дәстүрі мен қалыптасқан мықты журналистік мектебі бар телеарна. Біздің міндетіміз — ең құнды дүниелерді сақтап, оларға заманауи сипат беру, — деді ол.
LED-экран студияны икемді цифрлық кеңістікке айналдырады. Оның көмегімен тұтас қабырғаға карта шығарып, инфографика мен басқа да визуалды контентті көрсетуге болады. Бұл жүргізушіге көбірек еркіндік берсе, көрермен үшін эфирдегі бейненің динамикасын арттырады.
Көрерменге бұрыннан таныс жобалар да жаңарды. Олардың қатарында «Арқа Ақпарат» ақпараттық бағдарламасы, «Апта» қорытынды бағдарламасы және «Сәлем, Қарағанды!» таңғы шоуы бар.
Жаңа жобалардың бірі — «Айтылды, орындалды ма?». Журналистер бұған дейін айтылған тапсырмалар мен берілген уәделерге қайта оралып, олардың іс жүзінде қаншалықты орындалғанын тексереді.
«Теле-Дала» — дөңгелекті жылжымалы телестудия. Түсірілім тобы брендтелген шағын автобуспен облыстың қалаларына, аудандары мен ауылдарына барып, жергілікті жерден материалдар әзірлейді.
Тағы бір жаңа жоба — «Еңселі Қарағанды». Бағдарламада өңірдің өзіндік ерекшелігін танытатын орындар, адамдар мен жобалар көрермен назарына ұсынылады. Олардың қатарында туристік нысандар, кәсіпорындар, сондай-ақ мәдени және спорттық бастамалар болуы мүмкін.
Сонымен қатар телеарнаның жаңа маусымдық эфирлік кестесіне «Қамқорлық» және «Таразыда тәртіп» жобалары да енгізілді.
