Бала дүниеге келгенде қандай мемлекеттік жәрдемақы беріледі?

    Бала дүниеге келгенде қандай мемлекеттік жәрдемақы беріледі?
    Бала дүниеге келуі — әр отбасы үшін үлкен қуаныш әрі жаңа жауапкершіліктің бастауы. Қазақстан Республикасының әлеуметтік заңнамасында балалы отбасыларды қолдауға бағытталған бірқатар мемлекеттік жәрдемақылар қарастырылған.
    Бұл құқықтар Қазақстан Республикасының 2023 жылғы 20 сәуірдегі № 224-VII ҚРЗ Әлеуметтік кодексімен реттеледі.
    Бала туған кезде берілетін біржолғы жәрдемақы
    Әлеуметтік кодекстің 71-бабына сәйкес, балалы адамдардың әлеуметтік қорғалу құқықтарының бірі — бала тууына байланысты берілетін біржолғы мемлекеттік жәрдемақы.
    Бұл төлемді Қазақстанда тұрақты тұратын Қазақстан Республикасының азаматтары, қандастар, сондай-ақ халықаралық шарттарға сәйкес құқығы бар шетел азаматтары ала алады.
    Жәрдемақы мөлшері қанша?
    Әлеуметтік кодекстің 80-бабына сәйкес, бала туғанда берілетін жәрдемақы:
    - бірінші, екінші және үшінші балаға — 38 АЕК;
    - төртінші және одан кейінгі балаларға — 63 АЕК мөлшерінде төленеді.
    Маңыздысы — жәрдемақы мөлшері нақты жылы белгіленген айлық есептік көрсеткішке (АЕК) байланысты өзгереді. Сондықтан әр жылдағы төлем сомасы әртүрлі болуы мүмкін.
    Әлеуметтік кодекстің 79-бабының 3-тармағына сәйкес, бала туғанда берілетін жәрдемақыны тағайындауға өтініш беру мерзімі бала туған күннен бастап 18 айдан аспауға тиіс.
    Сондықтан ата-аналарға белгіленген мерзімді өткізіп алмау маңызды.
    Бірнеше бала дүниеге келсе ше?
    Егер бір уақытта екі немесе одан да көп бала дүниеге келсе, жәрдемақы әрбір балаға жеке-жеке тағайындалып, төленеді.
    Яғни егіз немесе үшеу туған жағдайда әр бала есепке алынады.
    Бала күтіміне байланысты жәрдемақы
    Мемлекеттік қолдау тек бала туған кездегі біржолғы төлеммен шектелмейді.
    Әлеуметтік кодекстің 81-бабында бала күтіміне байланысты жәрдемақы алу құқығы қарастырылған.
    Бұл төлемнің тағайындалуы ата-ананың және отбасының әлеуметтік жағдайына байланысты заңнамада белгіленген тәртіппен жүзеге асырылады.
    Мемлекеттік қолдау — отбасыға берілетін маңызды көмек
    Балалы отбасыларды әлеуметтік қолдау — мемлекеттің әлеуметтік саясатының маңызды бағыттарының бірі.
    Бала дүниеге келген кезде ата-ананың өз құқықтарын білуі, жәрдемақы түрлерін ажырата алуы және белгіленген мерзімдерді сақтауы маңызды.
    Заңды білу — өз құқығыңды дұрыс пайдаланудың алғашқы қадамы.

    Әлеуметтік желілерде memleket.kz-ке жазылыңыз

    Қазақстанның маңызды жаңалықтары мен пайдалы материалдары — өзіңізге ыңғайлы платформада.

    Ұқсас материалдар

    "Қазақстан Республикасының Еңбек және халықты әлеуметтік қорғау министрлігі Халықты әлеуметтік қорғау саласындағы реттеу және бақылау комитетінің Түркістан облысы бойынша департаменті" жаңалықтары