Алматы қаласында 21 127 мүгедектігі бар адам тұрады. Оларға сайлау учаскелерінде қолжетімділіктің қосымша, ерекше жағдайларын қамтамасыз ету қажет. Олардың ішінде 55%-ы тірек-қимыл аппараты бұзылған азаматтар, 26%-ы көру қабілеті бұзылған азаматтар, 11,5%-ы есту қабілеті бұзылған азаматтар, сондай-ақ 7,5%-ы кресло-арбамен жүріп-тұратын адамдар.
Қалада деректері қолжетімділік интерактивті картасына енгізілген 492 сайлау учаскесі бар. Аудан әкімдіктерінің мәліметтеріне сәйкес, барлық сайлау учаскелерінде мүгедектігі бар азаматтар үшін қолжетімділік қамтамасыз етілген.
Қазіргі уақытта Алматы қаласы Жұмыспен қамту және әлеуметтік бағдарламалар басқармасы, ҚР Еңбек және халықты әлеуметтік қорғау министрлігінің Алматы қаласы бойынша Әлеуметтік қорғау саласындағы реттеу және бақылау комитетінің департаменті және белсенді қоғамдық өкілдер сайлау учаскелеріне барып, олардың мүгедектігі бар азаматтардың барлық санаттары үшін нақты қолжетімділігін мониторингтен өткізуде. Бұл жұмыс дауыс беру күніне дейін жалғасады.
Азаматтардың қажеттіліктеріне қарай сайлау учаскелерінде пандустар немесе көтергіш құрылғылар, көмек шақыру батырмалары, тактильді көрсеткіштер, қажетті ені бар есік ойықтары, жеткілікті жарықтандыру, автокөлік қоюға арналған орындар, көру және есту қабілеті бұзылған адамдарға арналған арнайы құралдар, Брайль қарпімен жазылған ақпараттық материалдар, ымдау тілі мамандарының және тифло-сурдоаудармашылардың көмегі қарастырылады.
Дауыс беру күні жергілікті атқарушы органдар инватакси қызметінің жұмысын қамтамасыз етуге тиіс. Сонымен қатар мүгедектігі бар адам өзінің сайлау учаскесінің қолжетімділігі және онда қарастырылған мүмкіндіктер туралы ақпаратты қолжетімділіктің интерактивті картасы арқылы алдын ала ала алады.
Егер денсаулық жағдайына байланысты азамат сайлау учаскесіне келе алмаса, заңнамада белгіленген тәртіппен тұрғылықты жері бойынша дауыс беру мүмкіндігі қарастырылған.
Басты мақсат – әрбір мүгедектігі бар азаматқа басқа азаматтармен тең дәрежеде өзінің сайлау құқығын жүзеге асыруға мүмкіндік беру.
