Прокурорлармен кездесуде қылмыстық істерді тіркеу тәртібі, құқықтық статистика талаптары және процессуалдық құжаттарды рәсімдеу ережелері талқыланды.
Түркістан облысы Төтенше жағдайлар департаментінде орталық аппарат және аумақтық бөлімшелердің тергеушілерінің кәсіби біліктілігін арттыруға бағытталған семинар өтті.
Іс-шараға Қазақстан Республикасы Генералды прокуратурасының Түркістан облысы бойынша құқықтық статистика және арнайы есептер департаментінің қызметкерлері, сондай-ақ прокуратура органдарының өкілдері қатысты.
Семинардың негізгі мақсаты — тергеушілердің кәсіби білімін жетілдіру, заңнамалық талаптарды дұрыс және бірыңғай қолдануды қамтамасыз ету, әкімшілік құқық бұзушылықтар туралы істер мен қылмыстық істерді жүргізу сапасын арттыру және практикалық дағдыларды дамыту болып табылады.
Оқу барысында әкімшілік құқық бұзушылықтар туралы істер мен қылмыстық істерді тіркеу және есепке алу тәртібі, құқықтық статистика талаптарын сақтау, процессуалдық құжаттарды дұрыс рәсімдеу, заманауи ақпараттық жүйелермен жұмыс, сондай-ақ қызметтік практикада жиі туындайтын мәселелерді шешу жолдары қаралды.
Семинардың қорытындысында прокуратура мамандары мен құқықтық статистика саласының өкілдері заңнамалық талаптарды түсіндіріп, тергеушілердің сұрақтарына жауап берді. Практикалық мысалдарға сүйене отырып, қызметтік қызметтің өзекті мәселелері бойынша пікір алмасу жүзеге асырылды.
