Бухарест қаласы, 2026 жылғы 27 қазан – Қазақстан Республикасының Румыниядағы Төтенше және Өкілетті Елшісі Амангелді Саинов Румынияның Сауда-өнеркәсіп палатасының (CCIR) президенті Михай Дарабанмен кездесу өткізді.
Кездесуге сондай-ақ Румынияның бұрынғы Премьер-министрі, Парламенттің Депутаттар палатасының депутаты Виктор Понта және «KMG International» (Rompetrol) компаниясының өндіріс және өнеркәсіптік қызметтер жөніндегі директоры Еділ Өтеков қатысты.
Кездесу барысында тараптар Қазақстан мен Румыния арасындағы сауда-экономикалық және инвестициялық ынтымақтастықты одан әрі дамыту, іскерлік байланыстарды кеңейту және бірлескен бастамаларды іске асыру перспективаларын талқылады.
Қазақстан мен Румыния арасындағы сауда-экономикалық және ғылыми-техникалық ынтымақтастық жөніндегі Үкіметаралық комиссияның 2027 жылы Астана қаласында өтетін кезекті отырысына дайындық мәселесіне ерекше назар аударылды.
Осыған байланысты Комиссия отырысының қарсаңында екі елдің мемлекеттік органдары, іскерлік бірлестіктері мен компаниялары өкілдерінің қатысуымен қазақстандық-румыниялық бизнес-форум ұйымдастыру мүмкіндігі қарастырылды.
Сонымен қатар 2027 жылғы қазан айында Бухарест қаласында өтетін «INDAGRA 2027» халықаралық көрмесі аясында қазақстандық-румындық бизнес-форум өткізу мүмкіндігі талқыланды.
Кездесуде «KMG International» компаниясының инвестициялық жобалары мен оның Румыния экономикасын дамытуға қосқан үлесі талқыланды. Қатысушылар компанияның негізгі инвестициялық бастамаларын, сондай-ақ энергетика саласындағы Қазақстан-Румыния ынтымақтастығын одан әрі тереңдету перспективаларына ерекше назар аударды.
Михай Дарабан Rompetrol компаниясының Румыния экономикасындағы маңызды рөлін атап өтіп, оның энергетика саласын, өнеркәсіпті және инвестициялық әлеуетті дамытуға қосқан үлесіне тоқталды. Сондай-ақ ол Қазақстанмен экономикалық байланыстарды нығайту және екі елдің іскерлік топтары арасындағы өзара іс-қимылды кеңейтудің маңыздылығын атап өтті.
Ынтымақтастықтың перспективалы бағыттары ретінде энергетика, ауыл шаруашылығы және тамақ өнеркәсібі, көлік және логистика, өнеркәсіп пен ақпараттық технологиялар айқындалды. Тараптар кәсіпкерлер арасындағы тікелей диалогты дамытудың, тәжірибе алмасудың және бірлескен инвестициялық әрі сауда жобаларын ілгерілетудің маңыздылығын атап өтті.
Кездесу қорытындысы бойынша тараптар сындарлы диалогты жалғастыруға және практикалық ынтымақтастықты дамытуға мүдделілік білдірді. Бұл ретте 2027 жылы Астанада өтетін Үкіметаралық комиссия отырысына дайындыққа және бірлескен іскерлік іс-шараларды ұйымдастыруға ерекше мән берілді.
