ШЕТ АУДАНЫНДА ШАҒЫН КӘСІПКЕРЛІКТІ ҚОЛДАУ МАҚСАТЫНДА ГРАНТТАР ТАБЫСТАЛДЫ!

Ағымдағы жылы Шет ауданының әкімі шағын кәсіпкерлікті қолдау және жергілікті тұрғындардың кәсіпкерлік бастамаларын дамыту мақсатында гранттар беру бағдарламасын ұйымдастырды.

Гранттық бағдарлама аясында әр елді мекеннен ұсынылған 14 үміткердің жобасы қаралып, комиссия шешімімен 9 жоба жеңімпазы анықталды.

Қолдау тапқан жобалар қатарында жүн иіру, жартылай фабрикаттар өндіру, наубайхана ашу, шағын маркет ұйымдастыру, сүт өнімдерін өндіру және кондитерлік цех ашу бағыттары бар. Аталған жобалар аудан тұрғындарының сұранысын қанағаттандыруға, жаңа кәсіп түрлерін дамытуға және жергілікті халықты жұмыспен қамтуға бағытталған.

25 қазан – Республика күніне орай ұйымдастырылған салтанатты іс-шарада Шет ауданының әкімі Мұхит Сайлауұлы Мұхтаров грант иегерлеріне сертификаттарды табыстады.

Грант иегерлерін жеңістерімен құттықтай отырып, бастаған кәсіптеріне береке, мол табыс және толағай табыстар тілейміз!

Шағын кәсіпкерліктің дамуы – аудан экономикасының нығаюына, жаңа жұмыс орындарының ашылуына және тұрғындардың әл-ауқатының артуына жол ашады.