Қазақстан Республикасының күні қарсаңында Көкшетау қаласындағы «Болашақ» сарайында Ақмола облысының Төтенше жағдайлар департаменті ұйымдастырған салтанатты іс-шара өтті.
Іс-шарада Ақмола облысы Төтенше жағдайлар департаментінің бастығы Бақытжан Алашов жеке құрамды мемлекеттік мерекемен құттықтады. Ол Республика күнінің ерекше маңызын атап өтіп, бірліктің, отансүйгіштіктің және өз ісіне адалдықтың маңыздылығына тоқталды.
Өз сөзінде Бақытжан Алашов өңірде азаматтық қорғау органдарының инфрақұрылымын дамыту бағытында ауқымды жұмыстар жүргізіліп жатқанын атап өтті. Материалдық-техникалық база жүйелі түрде нығайтылып, бөлімшелердің жабдықталуы жетілдірілуде. Сонымен қатар құтқару қызметтерінің тиімділігін арттыру үшін қажетті жағдайлар жасалуда.
Іс-шараның жалғасы Департамент қызметкерлерін марапаттау рәсімімен өрбіді. Кәсібилігі, қызметтік міндеттерін адал атқарғаны және халықтың қауіпсіздігін қамтамасыз етуге қосқан үлесі үшін бірқатар қызметкер «Құтқару операцияларына белсенді қатысқаны үшін» және «Мінсіз қызметі үшін» медальдарымен марапатталды. Сондай-ақ Қазақстан Республикасы Төтенше жағдайлар министрлігі мен Ақмола облысының Төтенше жағдайлар департаментінің алғыс хаттары табысталды.
Салтанатты іс-шара Көкшетау қаласының шығармашылық ұжымдары дайындаған мерекелік концерттік бағдарламамен аяқталды. Музыкалық қойылымдар мерекелік көңіл күй сыйлап, еліміздің маңызды мемлекеттік мерекелерінің біріне арналған іс-шараның жарқын қорытындысы болды.
