ПРИРЕЧНЫЙ АУЫЛДЫҚ ОКРУГІНДЕ КІРПІШ ЗАУЫТЫНЫҢ ҚҰРЫЛЫСЫ ЖҮРУДЕ

Приречный ауылдық округінде кірпіш зауытының құрылысы ағымдағы жылдың тамыз айында басталды. Жобаның жалпы аумағы 3 гектарды құрайды.

Зауыттың өндірістік қуаттылығы тәулігіне 100 мың дана кірпіш өндіруге есептелген. Мұнда кірпіштің 4 түрін шығару жоспарланып отыр. Кәсіпорын толық қуатына шыққан кезде жылына 36,5 миллион дана кірпіш өндіретін болады.

Қазіргі уақытта нысанда инженерлік инфрақұрылымды тарту және құрылысқа қажетті дайындық жұмыстары жүргізілуде. Атап айтқанда, нысанды электр энергиясымен қамтамасыз ету мақсатында әуе және жер асты электр желілерін тарту, тірек бағандарын орнату жұмыстары атқарылуда. Сонымен қатар құрылыс алаңында жұмысшыларға қажетті жағдай жасалып, уақытша контейнерлер орналастырылған.

Жобаны 2027 жылдың екінші тоқсанына дейін толық аяқтап, пайдалануға беру жоспарланған.

Кәсіпорын іске қосылған кезде жергілікті тұрғындар арасынан 25 адам тұрақты жұмыспен қамтылады. Бұл жоба өңірдің құрылыс материалдарына деген сұранысын қамтамасыз етуге, жаңа жұмыс орындарын ашуға және ауылдық округтің әлеуметтік-экономикалық дамуына оң ықпал етеді.