Рухани келісім - бірлікке бастар жол

Абай облысында Рухани келісім күніне орай қоғамдық келісімді нығайтуға, конфессияаралық татулықты дәріптеуге және діни тұрақтылықты қамтамасыз етуге бағытталған облыстық форум өтті.
Форумның алғашқы күні, 14 қазанда, Абай облысы әкімінің орынбасары М. Раханов құттықтау сөз сөйлеп, қоғамдық келісім мен тұрақтылықты нығайтуға елеулі үлес қосқан азаматтарды марапаттады. Іс-шара аясында бірлік пен ынтымақтың символына айналған «Бірлік тамыры» атты көшет отырғызу әлеуметтік акциясы да ұйымдастырылды.
Сонымен қатар «IHSAN» ғылым және мәдениет орталығының төрағасы, PhD докторы, РАТТ мүшесі Тимур Нүсіпханов діни радикализм мен экстремизмнің алдын алу, сондай-ақ осы бағытта халықпен жұмыс жүргізудің тиімді тәсілдеріне арналған семинар-тренинг өткізді.
Семинар барысында қатысушылар діни радикализм мен экстремизмнің алдын алу мәселелері бойынша тәжірибе алмасып, тұрғындар арасында ақпараттық-түсіндіру жұмыстарын тиімді ұйымдастырудың жолдарын талқылады. Сондай-ақ профилактикалық жұмыстардың сапасын арттыру, қоғамдағы дінаралық келісім мен тұрақтылықты нығайту мәселелеріне назар аударылды.
15 қазанда командалық интеллектуалдық QUIZ ойыны өткізілді. Ойын қорытындысы бойынша үздік нәтиже көрсеткен командалар жеңімпаз атанып, арнайы марапаттарға ие болды.
Сонымен қатар форумға қатысушылар үшін Семей қаласының музейлеріне танымдық экскурсия ұйымдастырылды. Бұл шара қатысушылардың тарихи-мәдени мұра туралы білімдерін кеңейтіп, рухани құндылықтарға деген қызығушылығын арттыруға мүмкіндік береді.
Форум қоғамдағы өзара құрмет пен түсіністікті нығайтуға, татулық пен бірлікті дәріптеуге, дінаралық диалогты дамытуға және қоғамдық келісімді сақтауға бағытталған маңызды алаң болмақ.