Сайрам тұрғын алабындағы Өзбек драма театрының ғимаратында тұрғындармен «Отбасы құндылықтары және рухани тәрбие» және «Жастар тәрбиесі және діни сауаттылық» тақырыптарында кездесу өтті.

2026 жылғы 9 қазанда Шымкент қаласы, Сайрам тұрғын алабындағы Өзбек драма театрының ғимаратында тұрғындармен «Отбасы құндылықтары және рухани тәрбие» және «Жастар тәрбиесі және діни сауаттылық» тақырыптарында кездесу өтті. Іс-шараның негізгі мақсаты – отбасы институтының қоғамдағы маңызын насихаттау, ұлттық және рухани құндылықтарды дәріптеу, жастардың діни сауаттылығын арттыру және өскелең ұрпақтың бойында адамгершілік қасиеттерді қалыптастыру. Кездесуге сала мамандары қатысып, өзекті мәселелер бойынша түсіндіру жұмыстарын жүргізді. Атап айтқанда: Асанова Салтанат Сайлауқызы – PhD докторы, доцент; Рысбеков Кенжебек Туребаевич – «Ақниет» қоғамдық қорының (Ақпарат, насихат және оңалту орталығы) теологы. Кездесу барысында отбасы тәрбиесінің бала тұлғасын қалыптастырудағы рөлі, ата-ана жауапкершілігі, ұрпақтар сабақтастығы және ұлттық тәрбие мәселелері кеңінен талқыланды. Сонымен қатар жастар арасында діни сауаттылықты арттыру, дәстүрлі діни құндылықтарды дұрыс түсіндіру, деструктивті діни ағымдардың алдын алу және ақпаратты сыни тұрғыдан бағалау қажеттілігіне назар аударылды. Мамандар отбасыдағы сыйластық пен өзара түсіністіктің, рухани тәрбиенің және саналы ұстанымның қоғам тұрақтылығын нығайтудағы маңызын атап өтті. Сондай-ақ тұрғындар өздерін толғандырған сұрақтарын қойып, мамандардан жауап алды.