1 / 15
1 қазан күні Жанкент ауылдық кітапханасында «Үздік оқырман — 2026» облыстық байқауының І кезеңі өткізілді.
Қызылорда облыстық мәдениет, архивтер және құжаттама басқармасының ұйымдастыруымен өткізіліп отырған байқау Мемлекет басшысы Қасым-Жомарт Кемелұлы Тоқаевтың кітап оқу мәдениетін дамыту жөніндегі бастамалары мен «Кітап оқитын ұлт» жобасы аясында жүзеге асырылуда.
Байқаудың басты мақсаты — көркем әдебиетті насихаттау, оқырмандардың кітап оқуға деген қызығушылығын арттыру, білімді әрі зерделі оқырмандарды анықтау.
Байқау ІІІ кезеңнен тұрады:
І кезең — қалалық/аудандық іріктеу. Қатысушылар Оралхан Бөкейдің «Ұйқым келмейді» шығармасы бойынша бақ сынайды. ІІ кезең — аудандық/қалалық қорытынды. Қатысушылар Тынымбай Нұрмағанбетовтің «Періштелердің өлімі» және Смағұл Елубайдың «Ақ боз үй» шығармалары негізінде тапсырмалар орындайды. ІІІ кезең — облыстық Гранд-финал. Байқаудың ең шешуші кезеңінде аудандық және қалалық кезеңдерден үздік шыққан жеңімпаздар Ә. Тәжібаев атындағы облыстық әмбебап ғылыми кітапханада бас қосады.Байқаудың І кезеңінде қатысушылар Оралхан Бөкейдің «Ұйқым келмейді» шығармасы бойынша өз білімдерін ортаға салды.
Байқау басталмас бұрын қазақтың көрнекті жазушысы, драматург, журналист, «Алтайдың кербұғысы» атанған біртуар қаламгер Оралхан Бөкейдің өмірі мен шығармашылығы таныстырылды.
Қатысушылардың білімін саралап, шығарманы қаншалықты терең меңгергенін бағалау мақсатында әділқазылар алқасы жасақталды.
Әділқазылар алқасының құрамында:
Көмекбаева Жадыра — аудандық орталық кітапхананың әдістемелік-библиографиялық бөлімінің меңгерушісі; Орынбасарова Ғалия — жергілікті ақын, зерттеуші, зейнеткер ұстаз; Нұрадин Несібелі — зейнеткер кітапханашы; Әбдіразақ Еркін — №104 орта мектептің қосымша білім беру маманы; Орақбай Бақытгүл — №104 орта мектептің педагог-психологі.Қатысушылар өз білімдері мен әдеби танымын ортаға салып, шығарманы терең түсінгендерін көрсетті.
Байқау қорытындысы бойынша:
Бас жүлде — Қуанғали Қожахмет, Жанкент ауылының әкімі;
І орын — Меңеева Айжан, №104 орта мектептің қазақ тілі мен әдебиеті пәнінің мұғалімі;
ІІ орын — Күмекбаева Дина, №5 «Аққоян» бөбекжай-балабақшасының меңгерушісі;
ІІІ орын — Рсалы Болатбек, Жанкент ауылдық мәдениет үйінің директоры.Сонымен қатар байқауға белсене қатысқан оқырмандарға Ә. Тәжібаев атындағы облыстық әмбебап ғылыми кітапхананың басшысы С. Көзейбаевтың Алғыс хаттары табысталды.
Байқауға қатысып, белсенділік танытқан барша оқырмандарға, әділқазылар алқасына және іс-шараның өтуіне атсалысқан барша азаматтарға үлкен алғысымызды білдіреміз! 
Кітаппен бірге кемелдене берейік!
