Өскемен қаласында мемлекеттік айыптаушылардың үшінші республикалық форумының қорытынды сессиясы басталды. Онда жасанды интеллектті қолдану арқылы мемлекеттік айыптау институтын жетілдірудің өзекті мәселелерін, сондай-ақ жеке адамға қарсы қылмыстар және есірткінің заңсыз айналымына байланысты қылмыстық істер бойынша айыпты қолдаудың практикалық ерекшеліктерін талқылау жоспарлануда.
Форум жұмысына Шығыс Қазақстан облысының судьялары, заңгер-ғалымдары, адвокаттары және еліміздің барлық өңірлерінен келген мемлекеттік айыптаушылар қатысуда.
Форум сессиясын Қазақстан Республикасы Бас Прокурорының орынбасары Ғалымжан Қойгелдиев ашып, қылмыстық процеске қатысушылардың конституциялық құқықтарын сақтаудың айрықша маңыздылығын, сондай-ақ тағайындалған жазаның бұлтартпастығы мен әділдігі қағидаттарын қамтамасыз ету қажеттігін атап өтті.
Форумда жасанды интеллект элементтері бар «Мемлекеттік айыптаушы» ақпараттық жүйесі іске қосылды. Бұл жүйе соттарда мемлекеттік айыптаушылардың тиімді цифрлық көмекшісіне айналуға тиіс.
Осы бағытты цифрландырудың ерекше маңызы – қылмыстық процеске қатысушылардың құқықтарын қорғау және заң үстемдігі қағидатын қамтамасыз ету.
Сондай-ақ форумда судьялар, адвокаттар, тәжірибелі-заңгерлер, прокурорлар, полиция қызметкерлері және сот сараптамалары институтының сарапшылары жасанды интеллектті қолдану мүмкіндіктері, жеке адамға қарсы қылмыстар және есірткі құралдарын, психотроптық заттар мен олардың аналогтарын заңсыз айналымына байланысты істер бойынша сот ісін жүргізудің проблемалары мен ерекшеліктері туралы баяндама жасайды.
Екі күн бойы форум қатысушылары көтерілген өзекті мәселелер бойынша тәжірибе алмасып, практикалық шешімдерімен бөліседі.
Форум қорытындысы бойынша қылмыстық сот ісін жүргізу барысында көтерілген проблемаларды шешуге және мемлекеттік айыптау саласындағы цифрлық шешімдерді одан әрі дамытуға бағытталған нақты ұсынымдар әзірлеу жоспарлануда.
Бас прокуратураның баспасөз қызметі
