Бүгін Шымкенттегі «Арбат» аллеясы спорт пен салауатты өмір салтын ұстанатын тұрғындардың басын қосқан орынға айналды. Мұнда жүздеген қатысушы мен көрерменді жинаған «Тартыл FEST» фестивалі өтті.
Спорт пен белсенді демалысты жақсы көретін Шымкент тұрғындары бұл жолы да бұқаралық спортқа деген қызығушылығын көрсетті. Жастар арасында воркаутты насихаттауға және бұқаралық спортты дамытуға бағытталған «Тартыл FEST» фестивалі жоғары көңіл-күй мен салауатты бәсекелестік жағдайында ұйымдастырылды.
Іс-шара басталған сәттен-ақ «Арбатта» ерекше көңіл-күй қалыптасты. Ырғақты әуен мен жанкүйерлердің қолдауы қатысушыларға жігер беріп, олар күннің басты сынағы — кермеге тартылу сайысына дайындалды. Ұйымдастырушылар қауіпсіздік талаптарына сай арнайы спорттық алаңдар әзірлеп, спортшыларға өз мүмкіндіктерін толық көрсетуге жағдай жасады.
Фестивальдің басты ерекшеліктерінің бірі — қатысушыларға қатаң жас шектеуінің қойылмауы. Кермеге кәсіби спортшылармен қатар, өз күшін сынап көруге ниет білдірген әуесқойлар да шықты.
Жас спортшылар өздерінің шеберлігі мен физикалық дайындығын көрсетіп, қатарластарына үлгі болды. Ал воркауттың тәжірибелі спортшылары мен ардагерлері күрделі элементтерді орындап, көрермендердің ыстық ықыласына бөленді. Әртүрлі салада еңбек ететін ерлер мен әйелдер де спортпен кез келген адамның айналыса алатынын өз үлгісімен дәлелдеді.
«Тартыл FEST» ұйымдастырушыларының айтуынша, фестивальдің негізгі мақсаты — жастар арасында дене шынықтыру мен спортқа деген қызығушылықты арттырып, белсенді өмір салтын насихаттау. Спортпен айналысу үшін қымбат спортзалға жазылудың қажеті жоқ, ең бастысы — ниет пен қарапайым спорттық алаңның болуы.
«Шымкентте воркаутқа деген қызығушылық жыл сайын артып келе жатқанын байқап отырмыз. Бүгінгі фестиваль — қаламыздың тұрғындары салауатты әрі белсенді өмір салтын таңдағанының тағы бір дәлелі», — деді «XIII LEGION» спорт секциясының өкілі Дмитрий Подебида.
Әртүрлі салмақ және жас санаттары бойынша жеңімпаздарға естелік сыйлықтар мен дипломдар табысталды. Алайда қатысушылардың айтуынша, олар үшін жаңа таныстықтар, жағымды эмоциялар мен көтеріңкі көңіл-күй де маңызды болды.
Фестиваль қорытындысында қатысушылар мен ұйымдастырушылар естелік суретке түсіп, алдағы уақытта тағы да спорттық алаңдарда бас қосуға ниет білдірді.
2026 жылғы «Тартыл FEST» фестивалі Шымкенттегі воркаут әуесқойлары мен белсенді өмір салтын ұстанатын тұрғындардың басын қосқан маңызды спорттық шаралардың біріне айналды.
Шымкент бұқаралық спортты дамыту бағытындағы жұмыстарын жалғастырып, спорттың тек жарыс емес, салауатты әрі белсенді өмір салты екенін тағы бір мәрте көрсетіп келеді.
