Ауданда «Жас құтқарушылар» сыныбының оқушыларына жылыту және балық аулау кезеңдеріндегі қауіпсіздік, сондай-ақ алғашқы көмек көрсету бойынша практикалық сабақ өткізілді.
Шыңғырлау ауданының төтенше жағдайлар бөлімі қызметкерлері аудандық аурухана мамандарымен бірлесіп, «Жас құтқарушылар» сыныбының оқушыларына практикалық сабақ ұйымдастырды.
Сабақ барысында оқушыларға жылыту маусымында және балық аулау кезінде сақталуы тиіс негізгі қауіпсіздік талаптары түсіндірілді. Төтенше жағдай туындаған кездегі іс-қимылдарға және зардап шеккендерге алғашқы көмек көрсету алгоритміне ерекше назар аударылды.
Медицина қызметкерлері оқушыларға алғашқы көмек көрсетудің негізгі тәсілдерін көрсетті. Оқушылар алған білімдерін практика жүзінде бекітіп, шынайы жағдайларға барынша жақындатылған жағдайда қажетті дағдыларды пысықтады.
Мұндай практикалық сабақтар балалардың қауіпсіз мінез-құлық дағдыларын қалыптастырып, төтенше жағдай кезінде дұрыс әрекет етуге және мамандар келгенге дейін қажетті көмек көрсетуге дайындығын арттыруға мүмкіндік береді.
