Жыл басынан бері Астанада 700 мыңнан астам жасыл желек отырғызылды. Көгалдандыру жұмыстары елорданың барлық алты ауданын қамтыды. Қала әкімдігі саябақтар, гүлзарлар мен жағалаулардың Астананың туристік келбетін қалай өзгертіп жатқаны туралы айтып берді.
Урбанистика орталығының мәліметінше, елордада ауқымды жасыл аймақтарды біріктіретін біртұтас жаяу жүргіншілер кеңістігін қалыптастыру үрдісі байқалады. Заманауи қала құрылысы шешімдерінің арқасында серуендеу бағыттары тұрғындар мен қала қонақтары үшін барған сайын қолайлы бола түсуде.
Орталық мамандарының айтуынша, бұл қоғамдық кеңістіктер жайлылығы, ауқымы, заманауи абаттандырылуы және қала сәулетінің табиғи ландшафтпен үйлесімді ұштасуы арқылы туристердің көңілінен шығып үлгерді. Саябақтар мен жағалаулар Астана туралы алғашқы әсерді қалыптастырып, қаланың туристік тартымдылығын арттыруда маңызды рөл атқарады.
Қазіргі уақытта елорданың барлық алты ауданында көгалдандыру жұмыстары жалғасып жатыр. Сонымен қатар қалалық коммуналдық қызметтер инфрақұрылымды дамытуға және қоғамдық кеңістіктерді абаттандыруға күш салуда.
Жыл басынан бері Астанада 700 мыңнан астам жасыл желек, оның ішінде 21 мың ағаш пен 303,4 мың сәндік бұта отырғызылды. Әкімдіктің мәліметінше, көгалдандыру жұмыстары күзде де жалғасады. Биыл жалпы 70 мыңға жуық ағаш, сондай-ақ бір миллионнан астам көпжылдық гүл мен бұта отырғызу жоспарланған.
Қала әкімдігі соңғы айларда ауқымды көгалдандыру жұмыстары жүргізілген бірқатар аумақты атап өтті. Олардың қатарында EXPO саябағының аумағы, ҚТЖ гүлзары, «Көктал» саябағы, Күмісбеков, Керей мен Жәнібек, Қабанбай батыр, Қалдаяқов көшелерінің, Ұлы Дала даңғылының бойындағы учаскелер және басқа да орындар бар.
Елордадағы негізгі серуендеу орындарының бірі — Есіл өзенінің бойында орналасқан саябақтар кешені. Ол Бейбітшілік және келісім саябағын, Президенттік саябақты, Триатлон саябағын, Ататүрік саябағын, сондай-ақ жағалаудың ұзын бөліктері мен оларды байланыстыратын аллеяларды қамтиды. Алдағы уақытта осы ауқымды аумақты абаттандыру жұмыстары жалғасады.
Жақын арада Кіші Талдыкөл көлінің маңында көгалдандырудың бірінші кезеңі басталады. Мұнда аумақтың табиғи ландшафтын сақтай отырып, жас ағаштар мен басқа да өсімдіктер отырғызылады.
Бүгінде Астанада төрт миллионға жуық жасыл желек бар. Бұдан бөлек, елорданың жасыл белдеуі аумағында шамамен 14 миллион жасыл желек өсіп тұр.
Дереккөз:https://tengrinews.kz/kazakhstan_news/kak-zelenyie-zonyi-menyayut-turisticheskiy-oblik-astanyi-608712/
