Мен ветеринариялық дәріхана ашып, жануарларға арналған дәрілер сатқым келеді. Лицензия керек пе?
«Ветеринария туралы» Заңның 13, 13-1-баптарына сәйкес ветеринариялық мақсаттағы дәрілік заттарды өткізу жөніндегі қызмет лицензиялауға жатпайды. Қызметтің осы түрі үшін ветеринария саласындағы кәсіпкерлік қызметті жүзеге асырудың хабарландыру тәртібі белгіленген.
Осыған байланысты ветеринариялық дәріхана ашу үшін қызметті бастамас бұрын ветеринария басқармасына ветеринариялық мақсаттағы дәрілік заттарды, биологиялық препараттарды, ветеринариялық және зоогигиеналық мақсаттағы бұйымдар мен керек-жарақтарды өткізу жөніндегі кәсіпкерлік қызметтің басталғаны туралы хабарлама беру қажет.
Хабарлама «Е-лицензиялау» ақпараттық жүйесі арқылы беріледі. Кейс: Кәсіпкер Петропавл қаласында жануарларға арналған азық-түлік, ветеринариялық препараттар және басқа да тауарларды сататын дүкен ашқысы келеді. Ветеринариялық дәрілік заттарды сату үшін лицензия алу талап етілмейді, алайда кәсіпкер жұмысын бастамас бұрын ЖК немесе ЖШС ретінде тіркеліп, дәрілік заттарды сақтау талаптарына сәйкес келетін үй-жайды дайындауы және «Е-лицензиялау» жүйесі арқылы ветеринария саласындағы кәсіпкерлік қызметті жүзеге асырудың басталғаны туралы хабарлама беруі қажет.