Жылдың жылы мезгілі басталуымен тамақтан улану және тамақ арқылы берілетін аурулардың пайда болу қаупі артады. Мұндай жағдайлардың негізгі себептері – тамақ өнімдерін дайындау, сақтау және өткізу кезінде санитариялық-гигиеналық талаптардың бұзылуы, сондай-ақ жеке бас гигиенасы ережелерінің сақталмауы.
Тамақтан улану ауру тудыратын микроорганизмдермен, олардың уыттарымен немесе химиялық заттармен ластанған тамақ өнімдерін тұтыну салдарынан болуы мүмкін. Әсіресе ет және сүт өнімдері, балық және теңіз өнімдері, жұмыртқа, кремі бар кондитерлік өнімдер, дайын салаттар және басқа да тез бұзылатын тағамдар сақтау температурасы сақталмаған жағдайда аса қауіпті.
Тамақтан уланудың алдын алу үшін келесі қарапайым, бірақ тиімді профилактикалық шараларды сақтау қажет:
тамақ өнімдерін тек ресми сауда объектілерден сатып алу;
өнімнің жарамдылық мерзіміне, қаптамасының тұтастығына және сақтау жағдайына назар аудару;
көкөністерді, жемістер мен көк шөптерді тұтынар алдында мұқият жуу;
жеке бас гигиенасын сақтау, тағам дайындау және тамақтану алдында қолды сабындап жуу;
шикі және дайын өнімдерге арналған бөлшектеу тақтайшалар мен пышақтарды пайдалану;
етті, құсты, балықты және жұмыртқаны толық термиялық өңдеуден өткізу;
тез бұзылатын өнімдерді тоңазытқышта ұсынылған температурада сақтау;
бұзылу белгілері бар немесе жарамдылық мерзімі өткен өнімдерді тұтынбау;
рұқсат етілмеген сауда орындарынан үй жағдайында дайындалған консервілерді, сүт, ет және басқа да тағам өнімдерін сатып алмау.
Балалардың, егде жастағы адамдардың және иммунитеті әлсіреген азаматтардың тамақтануына ерекше көңіл бөлген жөн, себебі олар тағам арқылы берілетін инфекциялардың ауыр түрлеріне ең сезімтал.
Қоғамдық тамақтану объектілерінің басшылары тамақ өнімдерін өндірудің барлық кезеңдерінде санитариялық-эпидемиологиялық талаптардың сақталуын қамтамасыз ету, өндірістік бақылауды ұйымдастыру, үй-жайлар мен жабдықтарды уақытылы тазалау және дезинфекциялау жұмыстарын жүргізу, өнімдерді сақтау талаптарын сақтау, сондай-ақ міндетті медициналық тексеруден өткен және қолданыстағы жеке медициналық кітапшалары бар қызметкерлерді ғана жұмысқа жіберу тиіс.
Тамақтан уланудың алғашқы белгілері – жүрек айну, құсу, іш өту, іштің ауыруы немесе дене қызуының көтерілуі байқалған жағдайда, дереу медициналық көмекке жүгіну қажет. Өздігінен емделу ауыр асқынуларға әкелуі мүмкін.
Санитариялық- эпидемиологиялық талаптарды сақтау және тамақ өнімдерін таңдау, дайындау мен сақтау кезінде жауапкершілік таныту – тағамнан уланудың алдын алудың және халық денсаулығын сақтаудың негізгі кепілі.
Санитариялық-эпидемиологиялық бақылау басқармасы тұрғындарды қауіпсіз тамақтану қағидаларын сақтауға және тамақ өнімдерін тек рұқсат етілетін сауда орындарынан сатып алуға шақырады. Өз денсаулығыңызға және жақындарыңыздың денсаулығына ұқыпты қарау – әрбір отбасының амандығының кепілі.
«ҚР ДCМ СЭБК Қостанай облысының санитариялық-эпидемиологиялық бақылау департаменті Жітіқара аудандық санитариялық-эпидемиологиялық бақылау басқармасы» РММ
жетекші маманы
А.С. Жұмағалиева