Бүгін Ресей Федерациясының Омбы қаласында Қазақстан мен Ресейдің XXII Өңіраралық ынтымақтастық форумы өз жұмысын бастады. Бұл – экономика, инвестициялар, өнеркәсіп, көлік және шекара маңы ынтымақтастығын дамыту мәселелері талқыланатын екіжақты ірі жыл сайынғы алаңдардың бірі.
Биылғы форумның тақырыбы – «Жаһандық логистикалық экожүйені қалыптастыру: Ресей мен Қазақстан ынтымақтастығының жаңа көкжиектері».
Абай облысының делегациясы құрамында кәсіпкерлік, табиғи ресурстар және табиғат пайдалануды реттеу, жолаушылар көлігі және автомобиль жолдары, денсаулық сақтау, ішкі саясат басқармаларының басшылары, сондай-ақ бизнес қауымдастығының өкілдері қатысуда.
Форум аясында Абай облысының кәсіпкерлік және индустриялық-инновациялық даму басқармасының басшысы Айбек Рахымбеков Татарстан Республикасының өнеркәсіп және сауда министрінің орынбасары Герман Лернермен кездесу өткізді.
Кездесу барысында тараптар инвестициялық ынтымақтастықты дамыту, өнеркәсіптік кооперацияны кеңейту, бірлескен жобаларды іске асыру, сондай-ақ Абай облысы мен Татарстан Республикасы кәсіпорындары арасындағы өзара іс-қимылды нығайту мәселелерін талқылады.
Өңірдің форумға қатысуы іскерлік байланыстарды кеңейтуге, инвестициялар тартуға және облыс экономикасын дамытуға жаңа мүмкіндіктер қалыптастыруға бағытталған.