Қазақстанда балалардың профилактикалық медициналық қарауларын өткізудің жаңартылған ережелері 30 тамыздан бастап күшіне енді. Құжатқа сәйкес кейбір тексерулердің жас ерекшеліктері мен мерзімдері өзгертілді. Енді артериялық қысымды өлшеу 7 жастан емес, 6 жастан басталады, ал электр кардиограммасы (ЭКГ) 10, 14, 15 және 16 жаста жасалады. Жалпы қан мен зәр анализі 1 жаста, 2 жаста, 2,5 жаста, 5, 10, 14 және 16 жаста тапсырылады. Сонымен қатар, 2 жастан бастап және 3–17 жас аралығында жыл сайын ауыз қуысын қарау міндеттелді. Баланың бас шеңбері 5 жасқа дейін өлшеніп (кеуде шеңбері міндетті өлшеулер қатарынан алынып тасталды), ал 1 айдан 18 жасқа дейінгі барлық балаларға пульсоксиметрия жүргізіледі.
Медициналық араласуға ерікті түрде ақпараттандырылған келісім беру рәсімі ресми түрде бекітілді: 16 жасқа толмаған балалар үшін ата-анасы немесе заңды өкілі келісім береді, ал 16 жастан асқандар бұл шешімді өз бетінше қабылдай алады. Тексеру қорытындылары мен талдау нәтижелері ата-аналарға цифрлық жүйе немесе мобильді қосымша арқылы қолжетімді болады.
Бұдан бөлек, дене шынықтыру сабақтарына арналған топтар төрт санатқа бөлінді: негізгі (1-2 топ), дайындық (3-топ), арнайы (4-топ) және емдік дене шынықтырумен айналысатын босатылған топ (5-топ). Профилактикалық қарау кезінде ауру белгілері анықталса, цифрлық жүйе баланың педиатр немесе жалпы тәжірибелік дәрігер арқылы қосымша тексерулерге бағытталуын автоматты түрде қадағалайды. Сондай-ақ динамикалық бақылау аясы кеңейтіліп, бұған дейін созылмалы ауруы бар балалар ғана қамтылса, енді ағза қызметінде ауытқулары немесе қатер факторлары бар балалар да ерекше бақылауға алынады.
