Осакаров ауданының Есіл ауылындағы екі білім беру нысаны — №2 жалпы білім беретін мектеп пен колледж-мектеп-интернаттағы күрделі жөндеу жұмыстары аяқталуға жақын. Қазір құрылысшылар негізгі жұмыстарды аяқтап, ал ұжымдар жаңа оқу жылына орай ғимараттарды дайындауға кірісті.
Колледж-мектеп-интернатта оқу кабинеттері мен жатын бөлмелерді жинау жұмыстары басталды.
Ғимараттағы санитарлық бөлмелер жаңартылып, жатақхана қабаттарының бірінде шағын асүйі бар жеке демалыс бөлмесі жабдықталды. Бұған дейін студенттерде мұндай орын болмаған.
— Студенттер толық жөндеуден өткен ғимаратқа келеді. Енді олардың кешкі уақытта шай ішіп, бірге бас қосатын орны бар. Бұған дейін тек асхана болатын. Біз студенттерге оқу үшін ғана емес, сабақтан кейін араласуға да мүмкіндік беретін кеңістік жасағымыз келді, — деді колледж-мектеп-интернат директоры Қарлығаш Әбішова.
Өзгерістер ғимаратпен ғана шектелмейді. Білім беру мекемесі оқу базасын дамытуды жалғастырып келеді. Бүгінде мұнда үш бағыт бойынша мамандар қабылданады: тамақтануды ұйымдастыру, автомобильдерге техникалық қызмет көрсету, сондай-ақ кассир біліктілігі бар есеп және аудит.
Сонымен қатар колледж ауыл шаруашылығын механикаландыру саласы бойынша мамандар даярлауға арналған жаңа оқу жабдықтары мен тренажерлер алды. Бұл бағыт ауылдық жерлер үшін аса өзекті. Жаңа білім беру бағдарламасы бойынша қабылдауды келесі жылы ашу жоспарланып отыр.
Осакаров ауданының әкімі Руслан Нұрмұханбетовтің айтуынша, жөндеу жұмыстарының басты мақсаты — балалар, студенттер мен педагогтер үшін жайлы әрі заманауи жағдай жасау.
— Білім беру нысандарын жаңарту — ең алдымен балаларымыздың білім алып, педагогтердің жұмыс істейтін жағдайларын жақсарту. Біз ауыл тұрғындарына ұзақ жылдар бойы қызмет ететін заманауи әрі жайлы білім беру мекемелерін қалыптастыруға ұмтыламыз, — деді ол.
Фото: Осакаров ауданының әкәмдігі
