Патрульдік полиция ротасының қызметкерлері Бурабай кентіндегі Кенесары көшесінде патрульдеу кезінде артқы габариттік шамдары қосылмаған серуендеу электр автобусына назар аударды.
Көлік құралын тексеру кезінде полицейлер салонда бес жолаушы бар екенін анықтады. Белгілі болғандай, олардың барлығы жергілікті демалыс үйлерінің бірінен келе жатқан.
Жүргізушімен сөйлескен кезде полиция қызметкерлері алкогольдің иісін сезді. Осыған байланысты ер адам медициналық куәландыруға жіберілді. Бастапқыда жүргізуші өз мәліметтерін айтудан бас тартты, бірақ кейіннен қажетті процедуралардан өтуге келісті.
Медициналық куәландыру нәтижелеріне сәйкес жүргізушіде орташа дәрежелі алкогольдік мас күйі анықталды. Сонымен қатар, ер адам бұрын көлік құралдарын басқару құқығынан айырылғаны белгілі болды.
Жүргізушінің өзі түсіндіргендей, ол демалыс орындарының бірінде жүргізуші ретінде тағылымдамадан өтіп, курорттық аймақ бойынша таныстарын жүргізіп әкелмек болған. Алайда сапар патрульдік полиция қызметкерлерімен кездесумен аяқталды.
Осы факті бойынша сотқа дейінгі іс жүргізу басталды. Жүргізушіге қатысты заңнамаға сәйкес шаралар қабылдануда.
Полицейлер кәсіпкерлерді, әсіресе демалыс нысандары мен туристік сала өкілдерін жұмысқа қабылдау алдында қызметкерлер туралы құжаттар мен мәліметтерді мұқият тексеруге шақырады. Атап айтқанда, жүргізушілерде көлік құралдарын басқарудың қолданыстағы құқығының бар екеніне және олардың жұмысқа жіберілуіне кедергі келтіретін шектеулердің жоқтығына көз жеткізу қажет.
