Күнделікті тұтынатын тағамдардың сапасы мен қауіпсіздігі адам денсаулығына тікелей әсер етеді. Сондықтан дайын аспаздық өнімдерді, салаттарды, ет және балық тағамдарын, кондитерлік өнімдерді сатып алу кезінде олардың сапасы мен сақтау жағдайына ерекше назар аударған жөн.
Аспаздық өнімді таңдағанда ең алдымен өнімнің сыртқы түріне мән беріңіз. Өнімнің түсі, иісі, консистенциясы қалыпты болуы қажет. Бөгде иісі бар, түсі өзгерген, қабығы немесе бетінде көгеру белгілері байқалатын өнімдерді сатып алмаған дұрыс.
Өнімнің жарамдылық мерзімін тексеріңіз. Қаптамада өнімнің дайындалған күні, жарамдылық мерзімі және сақтау шарттары көрсетілуі тиіс. Жарамдылық мерзімі өтіп кеткен немесе таңбалануы анық емес өнімдерді сатып алуға болмайды.
Сақтау температурасына назар аударыңыз. Салаттар, ет, балық, сүт өнімдері және басқа да тез бұзылатын тағамдар белгіленген температуралық режимде сақталуы керек. Тоңазытқышта сақталуы тиіс өнімдердің бөлме температурасында ұзақ уақыт тұрғанын байқасаңыз, оны сатып алмаған жөн.
Сауда орнын таңдаудың да маңызы зор. Аспаздық өнімдерді арнайы жабдықталған, санитариялық талаптар сақталатын сауда орындарынан сатып алған дұрыс. Дайын тағамдардың шикі өнімдермен бірге немесе санитариялық жағдайы күмәнді жерде сатылмауына назар аударыңыз.
Қаптаманың бүтіндігін тексеріңіз. Қаптамасы бүлінген, ісінген, жыртылған немесе сұйықтық аққан өнімдерді сатып алудан бас тартыңыз. Өнімнің қаптамасында өндіруші туралы ақпарат және қажетті таңбалау мәліметтері болуы керек.
Үй жағдайында да сатып алынған тағамдарды дұрыс сақтау маңызды. Тез бұзылатын дайын тағамдарды тоңазытқышта сақтап, оларды белгіленген мерзім ішінде тұтыну қажет. Дайын тағамды шикі ет, балық және басқа да шикі өнімдерден бөлек сақтау ұсынылады.
Есте сақтаңыз: өнімнің сыртқы көрінісі жақсы болғанымен, оның қауіпсіздігіне кепілдік бермейді. Сондықтан аспаздық өнімдерді таңдағанда жарамдылық мерзімін, сақтау температурасын, қаптаманың бүтіндігін, таңбалануын және сауда орнының санитариялық жағдайын міндетті түрде тексеріңіз.
Дұрыс таңдалған және талапқа сай сақталған тағам — денсаулықты сақтаудың маңызды бөлігі.
