Кәмелетке толмағандардың еңбек құқықтарының сақталуын қамтамасыз ету және олардың заңсыз еңбекке тартылуына жол бермеу мақсатында түсіндіру және бақылау іс-шаралары күшейтілді. Осыған орай, Қазақстан Республикасының Еңбек және халықты әлеуметтік қорғау министрінің төрағалығымен өткен аппараттық кеңестің хаттамалық тапсырмасына сәйкес 2026 жылдың 27 шілде күні Отырар ауданы Шәуілдір ауылында кәмелеттік жасқа толмаған жасөспірімдердің еңбек құқығын бақылау мақсатында кезекті профилактикалық тексеру іс-шарасы өтті. Іс-шара Департаменттің мемлекеттік еңбек инспекторы Қаңлыбай Ернұр Сейтқалиұлы, Отырар аудандық «Жастар ресурстық орталығы» КММ-ның директоры Оралхан Айсұлтан Алмасұлы, Отырар аудандық «Отбасыны қолдау орталығы» КММ-ның құрылымдық бөлімше басшысы Құдайберген Бауыржан Құдайбергенұлы, «Отырар аудандық Жұмыспен қамту және әлеуметтік бағдарламлар бөлімі» ММ-нің бас маманы Әсетіллаев Қазыбек Талғатұлы, Отырар ауданды полиция бөлімінің ішкі істер бөлімі қызметкері Пазылбеков Ержан Білалұлының қатысуымен «Game Zone» (компьютерлік клуб), «Жұлдыз» кафесі, «Қоржын» азық-түлік дүкені, «Отырар» тамақтану орны және «Shaulderzki & 1 fish» тамақтану орындарында жүргізілді. Іс-шаралар барысында жұмыс берушілерге Қазақстан Республикасының еңбек заңнамасының талаптары түсіндіріліп, кәмелетке толмағандарды жұмысқа қабылдау кезінде еңбек шартын заң талаптарына сәйкес рәсімдеу, жұмыс уақытының ұзақтығын сақтау, ауыр, зиянды және қауіпті еңбек жағдайларындағы жұмыстарға жібермеу, сондай-ақ олардың қауіпсіз еңбек жағдайларымен қамтамасыз етілуі жөнінде кеңінен ақпарат берілді. Жүргізілген тексеру іс-шарасы нәтижесінде кәмелетке толмаған жасөспірімдер анықталмады және осы бағыттағы жұмыстар алдағы уақытта да тұрақты түрде жалғасатын болады.
