Бразилияның Сан-Паулу қаласында өткен IBSA Judo Grand Prix 2026 халықаралық турнирінде Қазақстанның пара дзюдо құрамасы табысты өнер көрсетіп, 3 алтын және 3 күміс медаль жеңіп алды. Осы нәтижемен ұлттық құрама жалпыкомандалық есепте 2-орынға тұрақтады.
Ұлттық құрама сапында өнер көрсеткен Шымкент қаласының спортшысы Ибрахим Нурмаханұлы J2 санатындағы 70 келіге дейінгі салмақ дәрежесінде барлық қарсыласын айқын басымдықпен жеңіп, алтын медаль иеленді.
Бұл – Ибрахим Нурмаханұлының халықаралық Grand Prix турнирлеріндегі қатарынан екінші алтын жүлдесі. Осылайша шымкенттік спортшы халықаралық аренада жоғары деңгейдегі тұрақты нәтижесін тағы бір мәрте дәлелдеді.
