Абай облысы әкімінің орынбасары Мейірлан Рахановтың төрағалығымен облыс әкімдігі жанындағы Үкіметтік емес ұйымдармен ынтымақтастық жөніндегі кеңестің кезекті отырысы өтті.
Жиында қоғамдық келісім мен этносаралық татулықты нығайту, сондай-ақ ауылдық елді мекендерді дамытуға бағытталған үкіметтік емес ұйымдардың бастамалары талқыланды.
– Қоғамдық келісім мен этносаралық татулықты сақтау, ауылдық аумақтарды дамыту бағытындағы бастамалар мемлекеттік саясаттың маңызды міндеттерімен сабақтас. Бұл жұмыстарда үкіметтік емес ұйымдардың белсенділігі ерекше мәнге ие, – деді облыс әкімінің орынбасары.
Кеңесте ішкі саясат басқармасының басшысы Жарқын Жұмаділов баяндама жасап, азаматтық қоғам институттарының қоғамдағы тұрақтылықты нығайтудағы маңызына тоқталды.
– Үкіметтік емес ұйымдар қоғамдық келісімді нығайтуға, этносаралық диалогты дамытуға және мемлекеттік бастамаларды халыққа түсіндіруге елеулі үлес қосып келеді, – деді басқарма басшысы.
Отырыс соңында кеңес мүшелері көтерілген мәселелер бойынша пікір алмасып, мемлекеттік органдар мен үкіметтік емес ұйымдардың бірлескен жұмысын жетілдіруге қатысты ұсыныстарын айтты.
