Маңызды талаптар:
Дәрігердің рецептісі бойынша босатылатын дәрілік заттарды рецептісіз сатуға (босатуға) тыйым салынады.(Қазақстан Республикасының «Халық денсаулығы және денсаулық сақтау жүйесі туралы» Кодексінің 233-бабының 5-тармағы).
Дәрілік заттарға рецепт № 078/у нысаны бойынша қағаз немесе электрондық форматта жазылады.(Қазақстан Республикасы Денсаулық сақтау министрінің 2020 жылғы 30 қазандағы № ҚР ДСМ-175/2020 бұйрығы).
Рецепт бойынша босатылатын дәрілік заттарды рецептісіз өткізу немесе босату Қазақстан Республикасының 2014 жылғы 5 шілдедегі № 235-V ҚРЗ «Әкімшілік құқық бұзушылық туралы» Кодексінің 426-бабының 1-бөлігіне сәйкес әкімшілік жауапкершілікке әкеп соғады.
Дәріханада дәрігердің рецептісі бойынша босатылатын дәрілік заттарды рецептісіз сату фактілері анықталған жағдайда, азаматтар Қазақстан Республикасы Денсаулық сақтау министрлігінің Медициналық және фармацевтикалық бақылау комитетінің Маңғыстау облысы бойынша департаментіне (Маңғыстау облысы, Ақтау қаласы, 9-шағын аудан, 23-ғимарат, 1-қабат) шағымдануға құқылы.
Азаматтардың өтініштерін қабылдау және өңдеудің бірыңғай «eOtinish» платформасы арқылы өтінішті онлайн түрде немесе Департаменттің кеңсесіне тікелей тапсыруға болады.
Өтінішті қарау үшін құқық бұзушылық фактісін растайтын материалдарды қоса тіркеу ұсынылады. Дәлел ретінде фото және бейнематериалдар қабылданады. Бейнежазбада дәріхананың атауы, босатылған дәрілік зат және фискалдық чек анық көрінуі тиіс. Сондай-ақ дәріхананың нақты мекенжайы көрсетілуі қажет.
