Қазақстан Республикасы Жоғары аудиторлық палатасы 2024-2026 жылдарға арналған үш жылдық мандат аясында Халықаралық сыбайлас жемқорлыққа қарсы академияға (IACA) тәуелсіз сыртқы аудит жүргізудегі жұмысын аяқтады.
Аталған кезеңде Жоғары аудиторлық палатаның өкілі Ләйлім Қашымова IACA-ға мүше басқа мемлекеттердің өкілдерімен бірге Академияның тәуелсіз сыртқы аудиторлар алқасының құрамында жұмыс істеді.
Мандат шеңберінде қазақстандық тарап Академияның қаржылық есептілігіне жүргізілетін жыл сайынғы аудитке, сондай-ақ ұйымның қаржылық басқару жүйесі мен институционалдық тұрақтылығын одан әрі нығайтуға бағытталған ұсынымдарды әзірлеуге қатысты. Жұмыс тәуелсіз сыртқы аудиттің халықаралық стандарттарына, сондай-ақ функционалдық және ұйымдастырушылық тәуелсіздік қағидаттарына сәйкес жүзеге асырылды.
Жоғары аудиторлық палатаның аталған механизм қызметіне қатысуы Қазақстанның ашықтық, есептілік және сыбайлас жемқорлыққа қарсы іс-қимыл саласындағы тиімді халықаралық ынтымақтастық қағидаттарына бейілдігін растайды. Сонымен қатар бұл халықаралық ұйымдармен және өзге мемлекеттердің жоғары аудит органдарымен кәсіби өзара іс-қимылды нығайтуға ықпал етеді.Анықтама ретінде:
Халықаралық сыбайлас жемқорлыққа қарсы академия (International Anti-Corruption Academy, IACA) — штаб-пәтері Австрияда орналасқан халықаралық үкіметаралық ұйым. Академия сыбайлас жемқорлыққа қарсы іс-қимыл саласында мамандар даярлау, зерттеулер жүргізу және халықаралық ынтымақтастықты дамыту мақсатында құрылған. Оның құрамына әлем бойынша мемлекеттер мен серіктес ұйымдар кіреді.
