Әділет министрлігінде азаматтық заңнаманы жетілдіру мәселелері талқыланды

2026 жылғы 29 қазанда Қазақстан Республикасы Әділет министрлігі жанындағы Қоғамдық кеңестің отырысы өтті. Отырыс Қазақстан Республикасының Президенті Қасым-Жомарт Тоқаевтың 2026 жылғы 28 қазандағы Жолдауын талқылауға арналды.
Отырыстың негізгі назарында азаматтық заңнаманы жетілдіру, Қазақстан Республикасының жаңа Азаматтық кодексін әзірлеу және құқықтық реттеудің тұрақтылығын қамтамасыз ету мәселелері болды.
Талқылау барысында қатысушылар азаматтық заңнаманы дамытудың өзекті бағыттарын қарастырып, қоғамдық және экономикалық үдерістердің қазіргі талаптарын ескере отырып, жаңа Азаматтық кодексті әзірлеу жөніндегі алдағы жұмысқа қатысты пікір алмасты.
Отырысқа заң қоғамдастығының, адвокатураның, нотариаттың өкілдері, сондай-ақ қоғамдық ұйымдардың мүшелері қатысты.
Кәсіби және азаматтық қоғам өкілдерінің заңнамалық бастамаларды талқылауға қатысуы құқық қолдану тәжірибесін ескеруге және елдің құқықтық жүйесін одан әрі жетілдіруге бағытталған ұсыныстар әзірлеуге мүмкіндік береді.