Республика күні қарсаңында Қарқаралы ауданының Көктас ауылында дене шынықтыру-сауықтыру кешені пайдалануға берілді. Енді ауыл тұрғындары спортпен шұғылдану үшін алысқа бармайды. Жаңа нысанда балалар мен ересектердің жаттығуына қажетті жағдай жасалған.
Спорт кешенінің ашылу салтанатына қатысқан аудан әкімі Саят Мусин
мен облыстық дене шынықтыру және спорт басқармасының басшысы Нүркен Нуратов ауыл тұрғындарын жаңа нысанның іске қосылуымен құттықтады.
— Мемлекет басшысы өз Жолдауында бұқаралық спорттың, әсіресе балалар спортының қолжетімді болуын басым бағыттардың бірі ретінде атап өтті. Жаңа кешен ересектер мен балаларды спортқа баулуға ықпал етеді деп сенемін. Бұл жер таңертеңнен кешке дейін адамға толы болып, ауыл тұрғындарының сүйікті спорт орнына айналады деп сенеміз, - деді Нүркен Нуратов.
Дене шынықтыру-сауықтыру кешенінің жалпы ауданы — 542 шаршы метр. Мұнда спорттық ойындарға арналған зал, душ бөлмелері мен әкімшілік бөлме жабдықталған.
Ауыл тұрғындары жаңа спорт нысанының ашылғанына қуанышты.
Спорт ардагері Жұмаш Құрманғалиев марафондар мен веложарыстарға қатысып, өзінің белсенді өмір салтымен жастарға үлгі болып жүр.
— Бұл жаңалыққа бүкіл ауыл қуанды. Жаңа кешен балаларымыздың спортта жетістікке жетуіне жол ашады деп ойлаймын. Бәлкім, болашақ чемпиондар да осы жерден шығып қалар, - деді ол.
Қарағанды облысында барлығы 1 384 спорт нысаны жұмыс істейді. Оның 300-ден астамы ауылдық жерлерде орналасқан. Былтыр өңірде 85 жаңа спорт нысаны ашылып, сонша жасанды жабынды спорт алаңы орнатылды. Сонымен қатар бес көпфункционалды хоккей корты салынды. Биылдың өзінде Шет және Ақтоғай аудандарында, сондай-ақ Ақтас кентінде жаңа спорт кешендері ашылды.
