Қарағанды қаласының 13 жастағы тұрғыны Тимофей Муравьев әлемдегі FPV-дрон жарыстарының ең беделді халықаралық додаларының бірі – World Drone Cup жарысына қатарынан үшінші рет қатысты. Биыл ол 24 елден келген 32 үздік ұшқыштың арасында WDC 2026 бәсекесінде Қазақстан атынан өнер көрсеткен жалғыз қатысушы болды.
Жарыс Түркияның Шанлыурфа қаласында авиация, ғарыш және технологияларға арналған әлемдегі ең ірі ашық аспан астындағы фестивальдердің бірі – TEKNOFEST аясында өтті.
Бірнеше күн бойы мұнда әуе шоулары, технологиялық көрмелер мен түрлі бағыттағы үздік мамандар бас қосатын халықаралық жарыстар ұйымдастырылады.
FPV-дрон ұшқыштары үшін басты дода алаңы – World Drone Cup жарыс жолы. Мұнда секундтың үлесі шешуші рөл атқарады: күрделі учаскеде жіберілген бір қателік келесі кезеңге өту мүмкіндігінен айыруы мүмкін. Қатысушылар дрондарды барынша жоғары жылдамдықпен басқара отырып, қақпалар мен түрлі кедергілерден өтеді. Мұндай жарыста лезде шешім қабылдау, дәлдік және қызу бәсеке кезінде дронды сенімді басқара білу аса маңызды.
Алайда әлемдік додаға қатысу үшін алдымен іріктеуден өтіп, жарысты ұйымдастырушылардың шақыруын алу қажет.
— World Drone Cup жарысына шақырту алу – еліңді халықаралық аренада таныстырып, әлемдегі үздік FPV-ұшқыштардың бірі атану үшін бақ сынауға берілген мүмкіндік. Мұның артында көп жылғы жаттығу, спорттық жетістіктер мен халықаралық деңгейдегі мойындау тұр. Әлемнің үздік ұшқыштары арасында Қазақстанның намысын қорғау – зор мәртебе әрі үлкен жауапкершілік, – дейді Тимофейдің әкесі Сергей Муравьев.
Әлемдік жарыс жолына шығудың өзі ұшқыштың шеберлігі мен осыған дейінгі жетістіктерінің мойындалғанын көрсетеді.
