Ержанов, Ермеков және Ғазалиев көшелерінде «Қарағанды Жарық» компаниясы электрмен жабдықтау кабель желілерін қайта жаңғырту жұмыстарын жүргізіп жатыр. Үш көшеде жалпы ұзындығы 5518 метр кабель ауыстырылады.
Қолданыстағы 6 кВ желілердің орнына көлденең қимасы 240 мм² болатын жаңа кабельдер тартылады. Бұл желінің өткізу қабілетін арттырып, электр энергиясын тұтыну шарықтайтын кезеңдерде шамадан тыс жүктеме түсу қаупін азайтуға және қуаттың қосымша резервін қалыптастыруға мүмкіндік береді.
Жаңғырту жұмыстары электрмен жабдықтаудың резервтік сызбасын да күшейтеді. Жоспарлы жұмыстар жүргізілген немесе қажетті ауыстырып-қосу шаралары кезінде жүктемені қайта бөлу мүмкіндігі артып, тұтынушыларды тұрақты электр қуатымен қамтамасыз етуге жағдай жасалады.
Кабельдердің негізгі бөлігі арнайы траншеяларға төселіп, механикалық зақымданудан қорғалады.
Кабель желісі автомобиль жолдарын, жаяу жүргіншілер жолдарын және басқа да инженерлік желілерді қиып өтетін жерлерде көлденең бағытталған бұрғылау әдісі қолданылады. Бұл тәсіл жол жабындысын ауқымды түрде қазып алмай-ақ, кабельді жер астымен жүргізуге мүмкіндік береді.
Үш көшедегі қайта жаңғырту жұмыстарын биылғы желтоқсан айының соңына дейін аяқтау жоспарланған.
«Қарағанды Жарық» компаниясы мұндай жобаларды Қарағанды қаласының электр желілерін кезең-кезеңімен жаңарту және күшейту аясында қаланың әр бөлігінде жүзеге асырып келеді.
Қарағанды қаласы әкімдігінің мәліметінше
