Аудандық Мәдениет үйінде Мұғалімдер күніне арналған салтанатты іс-шара өтті.
Бұл мереке – ұстаздарға олардың абыройлы, әрі жауапты еңбегі, мамандыққа деген адалдығы және өскелең ұрпақты тәрбиелеу мен білім беруге қосқан зор үлесі үшін алғыс білдіруге тамаша мүмкіндік.
Сандықтау ауданының ұстаздарын кәсіби мерекесімен аудан әкімі Серік Құдабай құттықтады. Өзінің құттықтау сөзінде аудан әкімі ұстаздың әр адамның өміріндегі маңызды рөлін атап өтіп, педагог тек білім беріп қана қоймай, тұлғаның қалыптасуына ықпал ететінін, адамгершілік қасиеттерді тәрбиелейтінін және балаларға болашаққа жол ашатынын атап өтті.
Салтанатты іс-шара барысында ауданның бірқатар педагогтары адал еңбегі, кәсібилігі және білім беру жүйесін дамытуға қосқан үлесі үшін Алғыс хаттармен және естелік сыйлықтармен марапатталды.
Мерекелік кештің ерекше сәті – Ұлан ауылының жалпы білім беретін мектебіне жаңа автобустың кілтін табыстау болды.
Мерекелік кеш шығармашылық бағдарламамен жалғасты. Сахна төрінен жылы лебіздер, әндер мен музыкалық нөмірлер орындалып, іс-шара қонақтарына көтеріңкі көңіл күй сыйлап, мерекелік ерекше атмосфера қалыптастырды.
