Кейбір мамандықтар бірнеше жылға таңдалса, енді біреулер үшін мамандық — өмірлік жол, жүрек қалауы. Осындай жанның бірі — Кобзева Ирина Анатольевна, 40 жылдан астам еңбек өтілі бар бастауыш сынып мұғалімі.
Ирина Анатольевна еңбек жолын 1984 жылы Целиноград педагогикалық училищесін тәмамдағаннан кейін бастады. Жолдамамен Широковка орта мектебіне жіберілді. Бір жылдан кейін отбасылық жағдайына байланысты Балкашино орта мектебіне ауысып, кәсіби жолының басым бөлігін осы мектепте өткізді.
Ұстаздық қызмет атқарған жылдары оның сыныбынан жүздеген оқушы түлеп ұшты. Көптеген шәкірті үшін Ирина Анатольевна жылдар өтсе де жүректе сақталатын алғашқы ұстаз болды.
Ол өз жұмысында әр баланың жеке ерекшелігін ескеріп, ойын және шығармашылық тапсырмаларды, заманауи педагогикалық әдіс-тәсілдерді қолданды. Ең бастысы — әр оқушыға қолдау көрсетіп, өзіне деген сенімін арттыруға тырысты.
Ирина Анатольевна үшін сабақ — тек білім беру емес, баланы түсіну, тыңдау, қолдау және дер кезінде мадақтау мүмкіндігі. Шәкірттері ұстазынан алған біліммен қатар, оның мейірімділігін, сабырлылығын, әділдігін және қамқорлығын да есте сақтайды.
2022 жылдан бастап Ирина Анатольевна Балкашино ауылының №2 жалпы білім беретін мектебінде педагогикалық қызметін жалғастырып келеді. Мұнда оның мол тәжірибесі мен балаға деген сүйіспеншілігі жаңа мектеп ұжымының игілігіне айналды.
Педагогика саласындағы 40 жылдан астам еңбек — мыңдаған сабақ, жүздеген баланың тағдыры, алғашқы әріптер мен алғашқы бағалар, шәкірт жетістігіне қуану және олардың болашағына деген сенім.
Ирина Анатольевна — мектепті жай ғана жұмыс орны емес, өмірінің бір бөлігіне айналдырған ұстаз.
