Медициналық-әлеуметтік сараптама жүргізу қағидаларына сәйкес, Қазақстан Республикасы Үкіметінің № 260 бұйрығымен бекітілген, 18 жастан асқан адамдарға мүгедектік қайта куәландыру мерзімінсіз мынадай жағдайларда белгіленеді.
1.Қалпына келмейтін кемістіктер мен аурулар кезінде
Мүгедектік қайта куәландыру мерзімінсіз Қағидаларға 7-1-қосымшада көрсетілген қалпына келмейтін кемістіктер мен аурулар болған кезде белгіленеді.
Қалпына келмейтін анатомиялық кемістіктерге, атап айтқанда, мыналар жатады:
Қағидаларда көзделген жағдайларда аяқ-қолдың немесе оның бір бөлігінің болмауы;
Қағидаларда белгіленген жағдайларда қолдың, табанның немесе жекелеген саусақтардың болмауы;
жоғарғы және төменгі аяқ-қолдардың ауыр ампутациялық тұқылдары;
бір немесе екі көздің болмауы, толық соқырлық;
омыртқа жарақаты салдарынан жұлынның толық анатомиялық үзілуі, төменгі параплегия немесе тетраплегия болған жағдайда — қайталап куәландыру кезінде;
7-1-қосымшада тікелей көрсетілген басқа да қалпына келмейтін анатомиялық кемістіктер мен аурулар.
- Организм функцияларының тұрақты және қалпына келмейтін өзгерістері мен бұзылыстары кезінде
Мүгедектік қайта куәландыру мерзімінсіз организм функцияларының тұрақты және және қалпына келмейтін өзгерістері мен бұзылыстары кезінде және оңалту іс-шаралары тиімсіз, сондай-ақ Қағидаларда көзделген басқа да талаптар орындалған жағдайда белгіленуі мүмкін.
Бұл — жүргізілген емдеу және оңалту іс-шараларының нәтижесінде бұзылған функцияларды қалпына келтіру немесе оларды едәуір жақсарту мүмкіндігі жоқ екенін білдіреді.
Бұл ретте:
толық көлемде жүргізілген емдеу және оңалту іс-шараларының нәтижелері;
қажет болған жағдайда операциялық емдеу және/немесе ағзаларды трансплантациялау нәтижелері;
организм функциялары бұзылыстарының тұрақтылығы мен қайтымсыздығы;
белгіленген мүгедектік тобының тұрақтылығы;
динамикалық бақылау нәтижелері ескеріледі.
Қағидаларда динамикалық бақылаудың мынадай мерзімдері көзделген:
I топ — кемінде 4 жыл;
II топ — кемінде 5 жыл;
III топ — кемінде 6 жыл.
Бұл ретте ерекшелік бар: жағдай 18 жастан асқан адамдарға мүгедектік 5 жыл мерзімге белгіленетін аурулар мен кемістіктердің тізбесіне (7-2-қосымша) енгізілген болса, бұл жағдайлар 7-2-қосымшаға сәйкес қаралады.
- Зейнеткерлік жастағы адамдарға
Зейнеткерлік жастағы адамдарға мүгедектік оңалтудың қолайсыз болжамы болған кезде қайта куәландыру мерзімінсіз белгіленеді.
