Усанин Игорь Николаевич — 29 жылдық педагогикалық өтілі бар дене шынықтыру пәнінің мұғалімі. Ол үшін спорт пен білім беру — өмірлік жолына айналған сүйікті іс. 1997 жылдан бері Біржан сал ауданындағы Макинка ауылының жалпы білім беретін мектебінде еңбек етіп келеді.
Игорь Николаевичтің «педагог-зерттеуші» біліктілік санаты бар. Ол — Қазақстан Республикасының спорт шебері, Ақмола облысының бірнеше дүркін чемпионы, Президенттік көпсайыстан республикалық жарыстардың жеңімпазы әрі жүлдегері, сондай-ақ білім беру қызметкерлерінің «Мұғалім» спартакиадасының бірнеше дүркін жеңімпазы.
Ұстаздық қызметі жылдарында Игорь Николаевич облыстық және республикалық жарыстарда жеңімпаз атанған және жүлделі орындарға ие болған 30-дан астам спортшыны тәрбиеледі. Оның 10 шәкірті спорт шеберлігіне кандидат нормативін орындады.
Педагогтің еңбегі спорттық жетістіктермен ғана шектелмейді. Ол — Біржан сал ауданының Құрметті азаматы, «Шапағат» мемлекеттік медалінің иегері. 2022 жылы «Білім берудегі үздік адамдар» халықаралық энциклопедиясына енгізілді. Сонымен қатар көп жылдан бері ауданның дене шынықтыру және алғашқы әскери дайындық пәндері мұғалімдерінің әдістемелік бірлестігіне жетекшілік етіп келеді.
Алайда Игорь Николаевичтің кәсіби жолы — бір ғана ұстаздың жетістігі емес. Бұл — мектепке, шәкірттерге, спортқа және педагогикалық еңбекке деген сүйіспеншілік ұрпақтан ұрпаққа жалғасқан Усаниндер әулетінің тарихы.
Әулеттің негізін Игорь Николаевичтің ата-анасы қалаған. Әкесі Николай Александрович Усанин 45 жылын педагогикалық қызметке арнап, дене шынықтыру және алғашқы әскери дайындық пәндерінен сабақ берді. Көп жылғы еңбегі үшін «Қазақ КСР ағарту ісінің үздігі» және «КСРО ағарту ісінің үздігі» атақтарына ие болды. Анасы Вера Ивановна физика пәнінің мұғалімі болып, ғұмырын мектепке және жас ұрпақты тәрбиелеуге арнады.
Отбасылық дәстүрді Игорь Николаевичтің жұбайы Галина Владимировна Усанина да лайықты жалғастырып келеді. Бүгінде ол мектепте ағылшын тілі мен технология пәндерінен сабақ береді.
Педагогикалық жол келесі ұрпақта да өз жалғасын тапты. Қызы Анастасия Игоревна Усанина биология пәні мұғалімі мамандығын ағылшын тілінде оқыту бағыты бойынша меңгерген. Ұлы Сергей Игоревич Усанин физика және математика мұғалімі мамандығын тәмамдаған. Қазіргі уақытта магистратурада білім алып, халықаралық онлайн-мектепте оқытушы болып жұмыс істейді.
Усаниндер әулетінің әрбір мүшесі білім беру мен бала тәрбиесіне өзіндік үлесін қосып келеді. Отбасында кәсіби білім мен тәжірибемен қатар, мектепке, шәкірттерге және туған өлкеге қызмет етуге деген шынайы ұмтылыс та ұрпақтан ұрпаққа беріліп келеді.
Усаниндер педагогикалық әулеті облыстық еңбек әулеттері байқауында ІІ орынға ие болды. Бұл — мамандыққа деген сүйіспеншілік, еңбекке адалдық пен ұстаздық дәстүрдің бірнеше ұрпақты біріктіріп отырғанының жарқын көрінісі.
