Сұрақ: Батыс Қазақстан облысында "Қаладан-ауылға пилоттық жобасы арқылы қалай, қай ауылдардан үй беріледі?

Жауап: Батыс Қазақстан облысында 2024–2026 жылдары жүзеге асырылатын «Қаладан – ауылға» пилоттық жобасы қала тұрғындарын ауылдық жерлерге қоныс аударуға ынталандыруды мақсат етеді. Бұл бағдарлама шекара маңындағы ауылдарды дамытуға, ауылдық аумақтардағы жұмыс күшінің тапшылығын жоюға, агроөнеркәсіп кешенін тұрақты дамытуға және шағын және орта бизнес субъектілерінің санын арттыруға бағытталған

Батыс Қазақстан облысында 2024–2026 жылдары жүзеге асырылып жатқан «Қаладан – ауылға» пилоттық жобасы аясында, қала тұрғындарын ауылдық жерлерге қоныс аударуға ынталандыру мақсатында бірқатар шаралар қарастырылған.
Қоныс аударушыларға ұсынылатын қолдау шаралары:
1-бағыт бойынша мемлекеттік қолдау шаралары мемлекеттік бағдарламалар және жобалар шеңберінде көрсетіліп келеді.
Ауылдың кадрлық әлеуетін жақсарту және қамтамасыз ету үшін "Дипломмен ауылға!" жобасы аясында (2025 жылы мамандарға көтерме жәрдемақы - 393,2 мың теңге (100 АЕК), тұрғын үй сатып алу/салу үшін аудан орталықтарына келген мамандар үшін 9 830 мың теңге (2500 АЕК), ауылдық елді мекендерге 7 864 мың теңге (2000 АЕК) құрайды).
Ауылдық елді мекендерге медициналық кадрларды тарту үшін медициналық және фармацевтикалық мамандарға 1,0 млн. теңгеден 8,0 млн. теңгеге дейін мөлшерде біржолғы төлем төлеу қарастырылды.
Тұрғын үймен қамтамасыз ету бойынша мемқолдау көрсету, ауданның тұрғын үй қоры есебінен, ҚР заңнамасына сәйкес жүргізіледі.
Жобаның жұмысқа орналасуға және кәсіпкерлік бастамаға жәрдемдесу шаралары – 2-бағыты бойынша:
- қоныс аударушыларға "Ауыл аманаты" жобасы аясында қолдау көрсетіледі;
- жаңа бизнес-идеяларды іске асыру үшін мемлекеттік гранттар беріледі;
- қосалқы шаруашылық жүргізуге арналған жер учаскелері беріледі;
- 2,5 пайыздан аспайтын жастарға шағын несие беріледі.
Сонымен қатар, қоғамдық жұмыстар, жастар тәжірибесі, жалақыны субсидиялау, «Бірінші жұмыс орны» жобасы, «Ұрпақтар келісімшарты», «Күміс жас» аясындағы жұмыспен қамту, кәсіптік оқыту шаралары көзделген.
Қоныс аударушыларға қойылатын талаптар:
• Тұрғылықты жері: Орал және Ақсай қалаларында кемінде бес жыл тұрып, еңбек еткен ҚазақстанРеспубликасының азаматтары.
• Мамандығы: Сұранысқа ие мамандар, жұмыс іздеп жүрген адамдар және жұмыссыздар.
Қоныс аударуға ниет білдірушілер үшін: «qoldau.bkogov.kz» арнайы сайты арқылы өтініш бере алады. Жеке қабылдауына жазылу арқылы, Батыс Қазақстан облысы әкімі аппараты жанындағы азаматтарды қабылдау орталығында қосымша ақпарат алуға болады.

Сілтеме НҚА: Батыс Қазақстан облысы әкімдігінің 2024 жылғы 12 қаңтардағы №8 қаулысы