2026 жылғы 23 шілдеде Жетісу облысының санитариялық-эпидемиологиялық бақылау департаменті Жетісу облысының білім басқармасымен ұйымдастырылған «Жазғы сауықтыру орталықтарында балалардың өмірі мен денсаулығының қауіпсіздігін, санитариялық-эпидемиологиялық талаптардың сақталуын және тамақтану сапасын қамтамасыз ету мәселелері бойынша» кеңеске қатысты.
Кеңеске жазғы сауықтыру орталықтарының басшылары мен жауапты мамандары қатысты. Іс-шараның негізгі мақсаты – балалардың қауіпсіз демалысын қамтамасыз ету, санитариялық-эпидемиологиялық талаптардың сақталуын күшейту және топтық тағамнан улану жағдайларының алдын алу.
Кеңес барысында балаларды сауықтыру объектілеріне қойылатын санитариялық-эпидемиологиялық талаптар, жаппай тағамнан уланудың және жіті ішек инфекцияларының алдын алу шаралары, ауыз су сапасына қойылатын талаптар, қоғамдық тамақтандыру объектілерінде санитариялық қағидаларды сақтау мәселелері түсіндірілді.
Сонымен қатар қатысушыларға ас блогының санитариялық жағдайын тұрақты бақылау, тағам өнімдерін қабылдау, сақтау және дайындау талаптарын сақтау, қызметкерлердің міндетті медициналық тексеруден уақтылы өтуі мен жеке гигиена қағидаларын қатаң сақтау қажеттігі айтылды.
Кеңес қорытындысында балалардың жазғы демалысын қауіпсіз ұйымдастыру үшін санитариялық-эпидемиологиялық талаптарды сақтау әрбір сауықтыру орталығының басты міндеті екені атап өтілді.