Мемлекеттік қызметтерді көрсету мәселелері бойынша
Қарағанды облысының жергілікті атқарушы органдарының 2025 жылғы қызметі туралы есеп
- Жалпы ережелер
Қазақстан Республикасының Цифрлық даму, инновациялар және аэроғарыш өнеркәсібі министрінің 2025 жылғы 14 тамыздағы № 424/НҚ бұйрығымен бекітілген «Мемлекеттік қызметтер тізіліміне» сәйкес Қарағанды облысының жергілікті атқарушы органдары мемлекеттік қызметтің 196 түрін және 158 кіші түрін көрсетеді. Оның ішінде 196 мемқызметтен 173 қызмет түрі тегін, 19 түрі ақылы, 4 түрі ақылы және тегін көрсетіледі.
2025 жыл ішінде облыста 16 315 314 мемқызмет көрсетілді. Оның ішінде «Азаматтарға арналған үкімет» мемлекеттік корпорациясы» КЕ АҚ Қарағанды облысы бойынша филиалының бөлімдері (әрі қарай – «Азаматтарға арналған үкімет» МК) арқылы 21 630 мемқызмет көрсетілді. Электронды түрде 16 234 016 мемқызмет, мемлекеттік органдар арқылы қағаз түрінде 59 668 мемқызмет көрсетілген.
Есепті кезеңдегі неғұрлым сұранысқа ие мемлекеттік қызметтер – денсаулық сақтау, мәдениет және ветеринария салаларындағы қызметтер, атап айтқанда:
«Дәрігердің қабылдауына жазылу» - 12 106 960 (74%) мемқызмет;
«Азаматтардың жекелеген санаттарына дәрілік заттарды, бейімделген емдік өнімдерді, медициналық бұйымдарды беру» - 1 239 716 (7,5%) мемқызмет;
«Архивтік анықтамалар, архивтік құжаттардың көшірмелерін немесе архивтік үзінділер беру» - 55 959 (0,3%) мемқызмет;
«Ветеринариялық анықтамалар беру» - 54 814 (0,3%) мемқызмет көрсетілді.
- Қызмет алушылармен жүргізілетін жұмыс
Облыстың қалалары мен аудандары әкімдерінің аппараттарында 13 Азаматтарды қабылдау орталығы жұмыс істейді.
Сонымен қатар, қалада Әлеуметтік қызметтер орталығы мен Отбасын қолдау орталығы жұмыс істейді. Сондай-ақ, «Арлан» бизнес-орталығының ғимаратында Мемлекеттік және сервистік қызмет көрсету орталығы жұмыс істейді.
Бұл жобалар консультациялар үшін, құжаттарды қабылдау және бірыңғай терезе мен электрондық кезек арқылы халыққа көмек көрсету үшін қолайлы алаң жасайды.
Қызмет алушылардың мемқызметтерді алу тәртібі туралы хабардар болу деңгейін арттыру бойынша тұрақты негізде жұмыс жүргізіліп, семинар-кеңестер, «дөңгелек үстелдер», брифингтер, конференциялар мен өзге де іс-шаралар өткізілді. 2025 жыл ішінде осындай 1 690 іс-шара өткізілді.
Мемлекеттік органдардың интернет-ресурстарының бірыңғай платформасында (МО ИРБП) мемлекеттік қызметтер бойынша іс-шараларды өткізуге қатысты материалдар, мемлекеттік қызметтер көрсету сапасының қоғамдық мониторингінің нәтижелері, заңдар, тиісті заңға тәуелді нормативтік құқықтық актілер, мемлекеттік қызметтер көрсету бойынша жергілікті атқарушы органдардың жұмысы туралы есептер, мемлекеттік қызметтер көрсету нәтижесіне шағымдану тәртібі туралы ақпарат орналастырылған.
Барлық меморгандарда және «Азаматтарға арналған үкімет» МК ғимараттарында қызметтерді алу, оларға шағымдану, қызметті алу мерзімдері туралы, сондай-ақ 1414 бірыңғай байланыс орталығы туралы ақпарат орналастырылған.
Облыс тұрғындарының мемқызметтер бойынша сұрақтарға «Сенім 109» бірыңғай үйлестіру орталығы арқылы да жауап алуына мүмкіндігі бар.
- Мемлекеттік қызметтер көрсету процестерін жетілдіру жөніндегі қызмет
Мемлекеттік орган қызметкерлері мен қызмет алушылардың қарым-қатынасын барынша азайтуды қамтамасыз ету үшін мемқызмет көрсету рәсімдерін электрондық форматқа көшіру бойынша жұмыс жалғастырылуда.
Облыс халқының мемқызметтерді электрондық нысанда алуға мүдделілігін арттыру үшін облыста халықты БАҚ арқылы тұрақты хабардар ету жүргізіледі, көрнекі жарнама орналастырылады, өзіне-өзі қызмет көрсету бұрыштары ұйымдастырылады, мемқызметтер жәрмеңкесі өткізіледі, буклеттер таратылады, қызмет көрсетушілерді «2-gis.kz» қосымшасына қосу бойынша жұмыстар жүргізіледі.
Жеке және заңды тұлғаларды қолжетімді және сапалы мемқызметтермен, оның ішінде электронды форматтағы қызметтермен одан әрі қамтамасыз ету мақсатында 2026 жылы мемқызметтерді «Азаматтарға арналған үкімет» МК, «электрондық үкімет» және «электрондық лицензиялау» порталдары арқылы алу мүмкіндіктері туралы түсіндіру жұмысы жалғастырылатын болады.
Мемлекеттік қызметтер көрсететін жергілікті атқарушы органдардың Мемлекеттік органдардың интернет-ресурстарының бірыңғай платформасының (МО ИРБП) ресми сайтында мемлекеттік қызметтер көрсету саласындағы тиісті ақпарат орналастырылған.
- Мемлекеттік қызметтер көрсету сапасын бақылау
2025 жылы облыстың мемлекеттік органдары мемқызметтер көрсету мәселелері бойынша бақылау іс-шараларының жоспарларын іске асырды. Жыл бойы 194 бақылау іс-шарасы өткізілді.
Тексеру барысында заңнаманың 682 бұзушылығы және 2 шағым түскені анықталған. Бұған орай жауапты тұлғаларға тәртіптік ықпал ету шаралары қолданылды. Нәтижелерді талдау қорытындылары бойынша тиісті ұсыныстар берілді.
Мемқызметтерді көрсету саласында қызметкерлердің біліктілігін арттыру мақсатында Қазақстан Республикасы Президентінің жанындағы Мемлекеттік басқару академиясының Қарағанды облысы бойынша филиалында курстар өткізіледі, 2025 жылы 126 маман оқытылды.
Облыстың басқармалары, қалалар мен аудандардың әкімдіктері «Мониторинг» АЖ-да мемқызметтерді көрсетудің тұрақты мониторингін жүргізеді.
Қалалар мен аудандардың әкімдіктерінде, облыстық басқармаларда мемқызметтерді көрсету сапасы бойынша іс-шаралар жоспары әзірленіп, бекітілді.
Мемқызметтер көрсететін мамандарға консультативтік және практикалық көмек көрсету бойынша іс-шаралар тұрақты негізде жүргізіледі.
- Мемлекеттік қызметтерді одан әрі көрсету тиімділігінің перспективалары және мемлекеттік қызметтер сапасына қызмет алушылардың қанағаттануын арттыру
Қызмет алушылардың мемлекеттік қызметтер көрсету сапасына қанағаттану деңгейін және Қазақстан Республикасы Мемлекеттік қызмет істері агенттігінің мемлекеттік әлеуметтік тапсырысы шеңберінде мемлекеттік қызметтерді көрсетудегі түйткілді мәселелерді анықтау мақсатында «Шығыс Қазақстан жастардың ақпараттық-талдау агенттігі» республикалық қоғамдық бірлестігі мемлекеттік қызметтерді көрсету сапасына қоғамдық мониторинг жүргізді. Зерттеу нәтижелері бойынша мемлекеттік қызмет көрсету сапасына қанағаттану деңгейі облыс бойынша 93,8% құраған.