2026 жылғы 1 маусымдағы жағдай бойынша Жамбыл облысында ұзақ уақыт бойы еңбек жағдайлары зиянды жұмыстарда еңбек еткен азаматтарға арналған арнайы әлеуметтік төлем (бұдан әрі – АӘТ) 105 азаматқа тағайындалды.
Есепті кезеңде арнайы әлеуметтік төлемді алу үшін 110 азамат өтініш білдіріп, оның 105-іне оң шешім қабылданды. Қанағаттандырылған өтініштердің үлесі 95,5%-ды құрады.
Арнайы әлеуметтік төлем қаржыландыру көздеріне қарай төмендегідей тағайындалады:
- 2 қаржыландыру көзі есебінен (республикалық бюджет және Бірыңғай жинақтаушы зейнетақы қоры) – 6 азамат өтініш беріп, барлығына арнайы әлеуметтік төлем тағайындалды (100%).
- 4 қаржыландыру көзі есебінен (республикалық бюджет, Бірыңғай жинақтаушы зейнетақы қоры, жұмыс беруші және өмірді сақтандыру компаниясы) – 104 азамат өтініш білдіріп, олардың 99-ына арнайы әлеуметтік төлем тағайындалды.
Анықтама үшін:
Қазақстанда арнайы әлеуметтік төлем тетігі 2024 жылғы 1 қаңтардан бастап қолданысқа енгізілді. Ол ұзақ уақыт бойы зиянды еңбек жағдайларында жұмыс істеген азаматтарды әлеуметтік қолдауға бағытталған.
Арнайы әлеуметтік төлемді тағайындаудың негізгі шарттары:
- азаматтың 55 жасқа толуы;
- Бірыңғай жинақтаушы зейнетақы қорына кемінде 7 жыл (84 ай) көлемінде міндетті кәсіптік зейнетақы жарналарының аударылуы.
Арнайы әлеуметтік төлем жалпыға бірдей белгіленген зейнеткерлік жасқа жеткенге дейін төленеді.
Төлемді алу үшін азамат зиянды еңбек жағдайларындағы жұмысын тоқтатуы қажет. Бұл ретте ол жеңілдетілген еңбек жағдайына ауысып, жалақысын сақтай отырып арнайы әлеуметтік төлемді қатар ала алады немесе еңбек қызметін толық аяқтап, зейнеткерлік жасқа дейін арнайы әлеуметтік төлемді алу мүмкіндігіне ие.
Әлеуметтік кодекстің талаптарына сәйкес арнайы әлеуметтік төлемді алуға құқық беретін кәсіптер тізбесіне экономиканың 17 саласы бойынша 2 300-ден астам мамандық енгізілген. Олардың қатарында тау-кен өндіру және өңдеу өнеркәсібі салаларының қызметкерлері де бар.