- Көлік құралдары салығын кімдер төлейді?
Қазақстан Республикасында меншік құқығында салық салу объектісі болып табылатын көлік құралдары бар жеке тұлғалар көлік құралдары салығын төлеушілер болып табылады.
Салық салу объектілеріне жеңіл және жүк автомобильдері, автобустар, мотоциклдер және заңнамада белгіленген басқа да көлік құралдары жатады.
- Көлік құралдары салығы қалай есептеледі?
Көлік құралдары салығы Қазақстан Республикасының Салық кодексінде белгіленген мөлшерлемелерге сәйкес есептеледі.
Салық сомасы көлік құралының түріне, жеңіл автомобильдер үшін қозғалтқыш көлеміне, тиісті салық мөлшерлемесіне және көлік құралын иелену кезеңіне байланысты айқындалады.
Салықты есептеу кезінде заңнамада көзделген жеңілдіктер мен ерекшеліктер ескеріледі.
- Салықты төлеу мерзімдері
- 2025 жыл үшін – 2026 жылғы 1 сәуірден кешіктірмей.
- 2026 жыл үшін – 2027 жылғы 1 сәуірден кешіктірмей.
Көлік құралдары салығы есепті салық кезеңінен кейінгі жылдың 1 сәуірінен кешіктірілмей төленеді.
- Кімдер салықтық жеңілдіктерді пайдалана алады?
Салық заңнамасында азаматтардың жекелеген санаттарына, оның ішінде мүгедектігі бар адамдарға, ардагерлерге және заңнамада белгіленген басқа да тұлғаларға көлік құралдары салығы бойынша жеңілдіктер қарастырылған.
Жеңілдіктер көлік құралының түріне, санына және заңнамада белгіленген талаптарға сәйкес қолданылады.
- Салықты қалай тексеруге және төлеуге болады?
Көлік құралдары салығының сомасын тексеруге, есептеуге және төлеуге келесі электрондық сервистер арқылы болады:
- e-Salyq Azamat мобильді қосымшасы;
- eGov.kz электрондық үкімет порталы;
- екінші деңгейдегі банктердің мобильді қосымшалары;
- мемлекеттік кірістер органдарының электрондық сервистері.
- Салық уақытылы төленбесе не болады?
Белгіленген мерзімде көлік құралдары салығы төленбеген жағдайда салық берешегі қалыптасады және мерзімі өткен әрбір күн үшін өсімпұл есептеледі.
Берешек өтелмеген жағдайда Қазақстан Республикасының заңнамасында көзделген мәжбүрлеп өндіріп алу шаралары қолданылуы мүмкін.
- Көлік құралын сатып алған немесе сатқан жағдайда салық қалай есептеледі?
Егер көлік құралы жыл ішінде сатып алынған немесе сатылған болса, салық меншік құқығының нақты кезеңіне сәйкес есептеледі.
Мысалы, көлік құралы жыл ортасында сатып алынса, салық толық жыл үшін емес, көлік құралына меншік құқығы болған тиісті кезең үшін есептеледі.
Көлік құралы сатылған жағдайда салық міндеттемесін дұрыс есептеу үшін оның жаңа меншік иесінің атына ресми тіркелуі маңызды.
- 2026 жылдан бастап енгізілген өзгерістер
2026 жылғы 1 қаңтардан бастап көлік құралдары салығын есептеу тәртібіне өзгерістер енгізілді.
Атап айтқанда, жеңіл автомобильдердің пайдалану мерзіміне қарай төмендетілген коэффициенттер қолданылады:
- 10 жылдан 20 жылға дейін (қоса алғанда) – 0,7 коэффициенті;
- 20 жылдан асқан жағдайда – 0,5 коэффициенті.
Аталған коэффициенттер 2026 жылғы салық кезеңінен бастап қолданылады және 2027 жылы төленетін салық сомасына әсер етеді.