ДЕНСАУЛЫҚ САҚТАУ МИНИСТРЛІГІ МЕДИЦИНАЛЫҚ ҰЙЫМДАР ЖҰМЫСЫНЫҢ ТИІМДІЛІГІНЕ БАҚЫЛАУДЫ КҮШЕЙТЕДІ
Денсаулық сақтау министрлігі ведомстволық бағынысты ұйымдардағы ішкі бақылауды күшейтуде. Негізгі назар мемлекеттік қаражатты ашық әрі тиімді пайдалануға, қаржылық тәртіпті сақтауға және басқарушылық тәуекелдердің алдын алуға бағытталған. Отан соғысы ардагерлеріне арналған республикалық клиникалық госпитальда кезекті ішкі аудит аяқталды.
Тексеру Денсаулық сақтау министрлігінің медициналық ұйымдарды басқару жүйесін жетілдіру бойынша жүргізіп отырған жүйелі жұмысының бір бөлігі болды. Аудит госпитальдің 2023 жылғы 1 қаңтардан 2026 жылғы
30 маусымға дейінгі кезеңдегі қызметін қамтыды.
Аудит қорытындысы бойынша Министрлік ішкі процестерді жетілдіруге бағытталған бірқатар шараларды айқындады. Олар бухгалтерлік есепті жүргізу, бюджет заңнамасының талаптарын сақтау, мемлекеттік сатып алуды жүзеге асыру және ішкі бақылауды күшейту мәселелерін қамтиды.
Госпиталь басшылығына аудит ұсынымдарын іске асыру және аталған бағыттар бойынша жұмыстың тиімділігін арттыру жөнінде нақты тапсырмалар берілді.
Қаржылық және сатып алу процестеріне жауапты қызметкерлердің біліктілігін арттыруға, сондай-ақ заңнама талаптарын бірізді қолдануға ерекше назар аударылды.
Министрлік үшін ішкі аудит, ең алдымен, алдын алу және басқару сапасын арттыру құралы болып табылады. Мұндай тәсіл қосымша назар аударуды қажет ететін бағыттарды уақтылы анықтауға, қажетті шараларды қабылдауға және мемлекеттік қаражатты пайдаланудың тиімділігін арттыруға мүмкіндік береді.
Бұл жұмыс жүйелі түрде жүргізіледі және денсаулық сақтау саласындағы ведомстволық бағынысты ұйымдарды қамтиды.
Басты міндет — басқарудың әрбір процесінің ашықтығын қамтамасыз ету және мемлекет тарапынан денсаулық сақтау саласына бөлінетін қаражатты тиімді пайдалану.
Министрлік медициналық ұйымдардағы қаржылық тәртіпті, ашықтық пен есептілікті нығайту бойынша жоспарлы жұмысты жалғастырады.